Aatsitassarsioqatigiiffik misissuisitsiniartoq
Pituffiup eqqaani nunaqarfiusimasup Moriusap sissaani titaniumitalimmik sukuluinnerpaat ilaannik saviminissaqarpoq.
Sioraappullu qernertumik qalipaatillit.
- Moriusap sissaa tamarmi qernertuinnaavoq. Taamalu nipisanut kajungerisaa nippukkumasorujussuit, pinnguarisarnikuuagut biilinnguarsuit nuannersorujussuusarnikuuvoq meeraanitta nalaani, Qaanaami aalisartoq piniartorlu Jens Danielsen oqarpoq.
Sunaaffali piniartoq taamanilu meeraqatini nunarsuarmi aatsitassat piumaneqarnerpaasussat ilaannik pinnguartarsimasut.
Aatsitassat ukiumut 400.000 tonsit
Aatsitassaq, saviminissaq ilmenitimik aamma taaneqartartoq, ilaatigut qalipaammut, pappilissanut plasticinullu atorneqartarpoq.
Aatsitassarsioqatigiiffiullu BlueJay Miningip taassuminnga ukiumut 400.000 tonsimik pissarsisarnissani naatsorsuutigaa.
Moriusalli kangia piniagassarpassuaqarfiuvoq:
- Aaveqarfiuvoq Moriusap eqqaa. Annertulaartorujussuarmik. Ussuit, natsit aataarpassuillu taakani najugallit. Taavalu miteqarfiuvoq appaqarfiullunilu, Jens Danielsen oqarpoq.
Aalisartoq piniartorlu, Jens Danielsen, Qaanaami borgmesteriunikuuvoq. Assi: Qaasuitsup Kommunia
Piniagassat
Aarrillu nerisannaavi, uillut sissallu naqqarmiui allat, akornusersorneqarsinnaasut, aatsitassarsiornerup avatangiisinut sunniutigisinnaasaatut suliffeqarfiup naatsorsuutigisai tusarniaaqqaarnermut saqqummiussaani atuarneqarsinnaavoq.
Taavalu aamma timmissat, soorlu appaat, imeqqutaalat appaliarsuillu piiaanerup nalaani umiarsuit assartuissutaasussat atorneqarnerini akornusersorneqarsinnaammata, avatangiisinut sunniutaasinnaasut pillugit naliliinissamut ilanngussassatut misissuiffigineqassaaq.
Moriusap kangia qilalugaq qaqortaqarfiummat, taakkua akornusersorneqarsinnaaneri paasiniarlugu suliffeqarfik immikkut aamma misissuisitsissaaq.
Tusarniaaneq maajip 19-anut killeqarpoq.
