Aatsitassanut Naalakkersuisoq nutaaq neriorsuisinnaanngilaq

Vittus Qujaukitsoq isumaqarpoq aatsitassanik uranitalinnik piianissamut tunngatillugu neriorsuinissaq siusippallaartoq.
maajip 16-at 2018 16:05

Kalaallit Nunaanni uranitalinnik piiaasoqarnissaanut akerliussutsimik takutitsisoqarmat, Vitus Qujaukitsoq siullermeersumik Naalakkersuisuuffimminut oqaaseqarpoq.

Akerliusunit tikkuarneqartoq annersaat ilaat tassaavoq uranimik piiaatitsisoqalissanersoq pillugu politikkerit innuttaasut peqataatinngippallaarmatigit. Avaaraq Olsen-ip oqalugiaatimini ima oqarpoq:

- Naalakkersuisooqatigiilertut innuttaasunik peqataatitsineq, qineqqusaarnermi nipituuliuutigeriarlugu isumaqatigiissumminni ataasiarlutilluunniit allassimanngilaat.

AAMMA ATUARUK Urani pillugu akerliusut tusaaqqusut

Vittus Qujaukitsoq oqaaseqarnermini innuttaasut qulaatiinnarneqassannginnerat naqissuserpaa, akerliussutsimillu takutitsisut oqaatigisaat Naalakkersuisoqatiminut apuukkumaarlugit neriorsorlugit. 

KNR-ip Vittus Qujaukitsoq Uran-imut tunngatillugu qanoq isumaqarnersoq aperaa.

Oqaaseqarnerni innuttaasut qulaallugit aalajangertoqassanngitsoq neriorsuivutit. Tassa imaappa innuttaasunik taasititsisoqasoq?

- Neriorsuisinnaanngiivippunga. Oqarsinnaavungali Naalakkersuisooqatigiit isumaqatigiissummik ullumimiit 2022-ip tungaanut atuuttussamik atsioqatigiinnikuusut. Isumaqatigiissummi allaqqavoq suliffissaaleqineq akiorneqassasoq aamma suliffeqarneq aningaasaqarnerlu qaffassarneqassasut. Tamakkuupput Kalaallit Nunaat ineriartortitsittariaqarneranut ersiutit.

Uran Demo

Naalakkersuisooqatitillu isumaqarpisi uranitalimmik piianikkut tamanna pissasoq?

- Naalakkersuisooqatigiinni uranimik piiaanissaq kissaatiginngilarput, taamak ersaritsigaaq. Aatsitassanilli qaqutigoortunik piianissaq kissaatigaarput. Uraninilli akoqassanersoq misiligutaasariaqarpoq. Qinnuteqaatinik pinikuunngilagut. Piffissap takutikkumaarpaa, taamammat maanna itisiliisinnaanngikkallarpunga.

AAMMA ATUARUK Partierne undveg at svare på uranspørgsmål

AAMMA ATUARUK Uranimut akerliusut marlungornermi ingerlaaqatigiissasut

 

 

 

 

Image removed.