Uranip isummerfiginissaa tunuarsimaarfigineqartoq

-Chancemik tigusinianngilagut ilisimanngisatsinnullu alloriarluta, Narsami Kuannersuarni aatsitassarsiornissamut nangaasuuteqanngivilluta naaggaarpugut, IAp siulittaasuata tullia Aqqaluaq B. Egede taama oqarpoq.

Taanna aamma isumaqarpoq ullumikkut ajornartorsiutaasut qaangerniarnissaannut inuussutissarsiutinik nutaanik nassaarnissamut periarfissaqarluartoq. Partiit sinnerisa uranitalinnik piiaasoqarsinnaanerannut tunngasoq toqqaannartumik akissuteqarfiginngilaat, aatsitassallu allat piiarneqarsinnaanerat isummerfigerusunnerullugu.

AAMMA ATUARUK Uranimik suliniutissaq GME-p akueraa - avatangiisinik illersuiniaqatigiit kamapput

Meeqqat ajornartorsiortut, suliffissaaleqisut, atuarfinni ingerlanerlunneq inissaaleqinerlu muminneqassappata inuussutissarsiutinik nutaanik pilersitsisoqartariaqartoq Siumumit Simon Simonsen isumaqarpoq:

-Aatsitassarsiorneq tassani pingaaruteqartumik inissisimavoq pinngitsoorneqarsinnaananilu.

Nunatta Qitornai tassunga isumaqataapput. Demokraatit suliffissanik pilersitsisoqartariaqarnera tikkuarpaat. Aatsitassarsiorneq Naalakkersuisunit pingaarutilittut isigineqarmat innuttaasut aalajangiisarnernut malinnaatinneqarnissaat minnerunngitsumillu Naalakkersuisut isumannaallisaaneq pillugu inatsisiliortoqarnissaanik qulakkeerinnittariaqartut Suleqatigiissitsisut kissaatigaat. Partii Naleqqap aatsitassarsiorniarnerup ukiorpassuarni oqaluuserineqaannarsimanera uparuarpaa maannakkullu aallartinneqarnissaa kaammattuutigalugu, tamatumunnga Atassut isumaqataavoq.

-Aallartingikkuttami qaqugu aallartissagatta aatsitassarsiornermi, Atassummit Bentiaraq Ottosen erseqqissaavoq.

AAMMA ATUARUK Naalakkersuisunngortut urani pillugu aalajangiinissaq kinguartippaat