Aaqqissuisuuneq: Naalakkersuisunngortut urani pillugu aalajangiinissaq kinguartippaat
- Nunatta aningaasaqarniarnerata patajaallisarneqarnissaa qitiuvoq, ineriartortitsisoqartariaqarpoq, taava uranimut apeqqut aamma isummerfigineqartariaqassaaq. Partiit tamanna maannangaaq isumaqatigiissutiginagu isumaqatigiissutigisinnaavaat, Poul Krarup oqarpoq.
Assersuutigalugu uranitalinnik piiaasinnaanissamut qinnuteqaammik takkuttoqarpat Naalakkersuisut tamanna qanoq isummerfiginiarneraat maanna apeqqutaaginnalerpoq.
- Naalakkersuisoqatigiit tamanna pillugu aaqqiagiinngissuteqalissagaluarunik tamanna anigorsinnaassaneraat naluara. Politikkimili suulluunniit periarfissaapput, pingaartumik Kalaallit Nunaanni, aaqqissuisuuneq oqarpoq.
Kalaallit Nunaata allanngortinneqarsinnaanngitsumik namminiilivikkiartortoq, partiit naalakkersuisoqatigiilersut isumaqatigiissutaanni ilaatigut allassimavoq, soorlu nammineq aamma allattut: "Taamatut ingerlaneq naalakkersuinikkutpatajaatsumik ingerlatsiviusarpoq, nunalu tamakkerlugu ataatsimoornissaq pisariaqalerluni."
Kalaallinut tamanna pitsaasuusoq Poul Krarup isumaqarpoq, naalakkersuisoqatigiilersullu ataatsimut isigalugit iluaralugit:
- Partiit angisuut marluk Siumut Inuit Ataqatigiillu amerlanerussuteqarluarlutik naalakkersuisoqatigiilermata iluarinarpoq, Sermitsiap aaqqissuisuunera Poul Krarup oqarpoq.
