Aatsitassanut inatsisitaassaq illuatungiliuttut ernummatigaat

Naalakkersuisut aatsitassanut uranitalinnut inerteqquteqalernissamut qineqqusaarutertik eqquutsitinniarsarilerpaat. Inuit Ataqatigiimmi Naleraqqallu inatsisissatut siunnersuut tusarniaassutigileruttorpaat, akuersissutigineqassappallu uranimut akuersaanngilluinnarneq atuutilissaaq.

Taamaaliortoqassappallu nunatsinni aatsitassarsiorsinnaanermut periarfissat akornuserneqassasut, illuatungiliuttunit tassa Siumumit Demokraatiniillu isumaqarput.

- Tassa soorlu assersuutigiinnarlugu aatsitassarsiorfiit nunatta avataaninngaanneersut suliffissanik pilersitsiniarput, akileraarutitigut suliffinnillu pilersitsiortornikkut nunatta immikkoortuisa ilaani iluaqutaasussanik taamaalilluni suliffissaaleqinerup suli annikinnerulernissaa, minnerunngitsumillu nunatta aningaasarsiornikkut siuariartornissaa namminiilivikkiartornerup aqqani, massakkut tassunga ingerlajartulerunnaarsimasutut isikkuneriartorpugut.

Siumup siulittaasua Erik Jensen taama oqarpoq, taamatullu anguniagaqarneq pissutaalluni namminiilivinnissamut anguniagaqarnerput imaannaannginnerulissasoq taanna isumaqarpoq.

Nuna tutsuiginarunnaassaaq

Aatsitassarsiorneq pillugu inatsit 2010-mi atuutilersoq ullumikkut allanngortinneqartariaqanngitsoq Demokraatit isumaqarput. Partiip siulitaasuata, Jens Frederik Nielsenip, Naalakkersuisut aatsitassanut aalajangersimasunut uranitalinnut inerteqquteqalernissamik kissaateqarnerat tunngaviusumik isumaqatiginngilaa.

- Isumaqarpunga ullumikkut aatsitassanut inatsisitta piunera ilusaalu ajunngitsoq naammattorlu. Eqqaamassavarput aamma maannakkut aatsitassat ilaannut taamatut inerteqqusiilluni tutsuiginassusermut aningaasaliiffissatut qanoq isumaqarnersoq. Ila maanna aatsitassaq aalajangersimasoq pineqartoq misissuinermi piiarnermilu sukkulluunniit attuumaassuteqarpat unitsinneqarsinnaasoq sunaluunniit ingerlataq. Taanna nunarsuarmioqatitsinnut tutsuiginassusitsinnut sakkortuumik kalluaasussaavoq, taannalu uggornarpoq.

AAMMA ATUARUK Naalakkersuisoq: Uranimut akuersaanngilluinnarnerup atuutileqqinnissaanut alloriarneq siulleq

Nunatsinni aatsitassat uranitallit ulorianartunillu qinngornitallit allat aningaasarsiornikkut iluaqutaalluarsinnaasut Demokraatit isumaqarput. Jens Frederik Nielsenip uran Europami atomimik nukissiorfimmut tunisassiarineqarsinnaasoq assersuutigaa.

Saffiugassallu qaqutigoortut biilinut innaallagiatortunut bateeriliassatut atorneqarsinnaasut taasuma innersuussutigaa.

- Uanga oqanngilanga Kalaallit Nunaanni uagut nammineq aallartisassagigut, oqaatigiinnarpara uuma uranip nunarsuarmi atugassatut piumaneqarnera aallaavigalugu tunisassiornissamut uagut nunatsinninngaanniit periarfissaqarpoq, Jens Frederik Nielsen oqarpoq.

Ulorianartunik qinngornitallit ineriartuutaasinnaapput

Jens Frederik Nielsenip oqarnera naapertorlugu aatsitassanut inatsisip maanna atuuttup soorlu aatsitassanut uranitalinnik ulorianartunillu qinngornitalinnik allannik piiarnissap avatangiisinut inuiaqatigiinnullu isumannaatsuunissaa qulakkeerpaa.

- Demokraatininngaaniit tunngaviusumik isumaqatiginngilarput. Isumaqanngilagut uagut aatsitassat immikkoortillugit inatsisini immikkoortuni arlaannik inerteqquteqarneq aqqutissaasoq, isumaqarpunga massakkut aatsitassanut inatsisiuterput nunarsuarmi pitsaanerpaat ilaanniittoq makkua tamavimmik ernumananngitsumik inissikkaat, qanorluunniit aatsitassaq ateqaraluarpat.

Pinngoqqaatinut radioaktiviusunut allanut misissueqqaartoqassappat, ujaasisoqassappat piiaasoqassappallu piiarneqarniartot 0,01 procentimik uraneqarnissaannik killilerneqartoq siunnersuumi aamma allaqqavoq.