Naalakkersuisoq: Uranimut akuersaanngilluinnarnerup atuutileqqinnissaanut alloriarneq siulleq
Inatsisartunut ilaasortat ataatsimiilerunik oqaluuserisassaat ataaseq pingaartinneqartupilussuussaaq.
Nunatsinnimi uranisiornissamut misissueqqaarnerit, ujaasinerit piiaanerilluunniit inerteqqutaalernissaat Naalakkersuisuni politikerit kissaatigaat. Inatsisissatut siunnersuummi tusarniaassutigineqaleqqammertumi tamanna atuarneqarsinnaavoq.
Innuttaasut, suliniaqatigiiffiit naalakkersuisunut attuumassuteqanngitsut nunattalu politikerii suliamut aggustip aappaata tungaanut isummernissaminnut periarfissaqarput. Tamannalu naalakkersuisup Naaja Nathanielsenip (IA) qilanaaraa.
- Oqallinneq qujaruppara, uranimullu akuersaanngilluinnarnerup atuutileqqinnissaanut alloriarnerni siulliusoq eqqarsarlunga, Naaja Nathanielsen KNR-imut oqarpoq.
Ulorianartunik qinngornilinnik, soorlu uranimik, nunatsinni piiaanissaq inerteqqutaanikuuvoq. Taakkuninngalu ujaasinissap inerteqqutaaleqqinnissaa Naalakkersuisut siunnersuutigaat.
- Nutaartaa tassaavoq, taamaallaat piiaanissaq inerteqqutaanani aamma misissueqqaarnerit ujaasinerillu inerteqqutaalernissaat.
- Immikkut piumasaqaatitalinnik ujaasinissamut siornatigut akuersisoqartarmat, maanna akuersissutigineqareertut akuersissutigineqarsinnaanikuupput, Naaja Nathanielsen nassuiaavoq.
Akuersaanngilluinnarneq 2013-ip tungaanut atuuttoq
Akuersaanngilluinnarneq 2013-imi atuukkunnaarsinneqarpoq. Taamaasillunilu uranimik ilaatigut Kujataani Kuannersuarni siunissami piiaasinnaanissaq periarfissaalerpoq.
Suliniut Greenland Mineralsimit ingerlanneqartoq ukiorpassuarni ingerlanikuuvoq, suliniummulli pingaaruteqarluinnartoq decembarimi aallartippoq. Piiaaffissap avatangiisinut sunniutissai pillugu nalilersuinini tassani tusarniaassutigilerpaa.
Tusarniaanerlu suli ingerlasoq assortuutsitsivoq, Inatsisartunullu qinersinissaq qaammatialunnguit qaangiutiinnartut nalunaarutigineqarpoq. Inuit Ataqatigiit suliniutip unitsinnissaanik uranimullu akuersaanngilluinnarnerup atuutileqqinnissaanik taamani qineqqusaaruteqarput.
AAMMA ATUARUK Uranimik inerteqquteqarnissamut Naalakkersuisut aallartisartut
Inatsisissatut siunnersuutip tusarniaassutigineqaleqqammertup maannatut isikkoqartillugu akuersissutigineqassaguni Kuannersuarni suliniut taamaativinnavianngikkaa, Naaja Nathanielsen nassuiaavoq. Suliniummulli akornusiisinnaavoq.
- Assersuutigalugu Greenland Minerals uranimik piiaanissamut akuersissummik qinnuteqarpat, una inatsit atorlugu itigartitsisinnaassaagut, naalakkersuisoq oqarpoq.
- Akuersissutaareersut suneqarnavianngillat, inatsilli nutaaq siunissami qinnuteqaatini malinneqassaaq, Naaja Nathanielsen oqarpoq.
Nunatsinni piaaffimmik ammaanermut suliat sivisoorujussuusarput, aamma avatangiisinut sunniutissanut naliliinerup tungaanut.
Avatangiisinut sunniutissanut naliliineq tamanut ammasumik tusarniaassutigineqareerlunilu akuersissutigineqarpat, piiaanissamut akuersissummik qinnuteqartoqarsinnaavoq.
Narsap eqqaaniittoq Kuannersuit uani takuneqarsinnaavoq. Greenland Minerals saffiugassanik qaqutigoortunik uranitalinnik tassani piaanissamik kissaateqarpoq. Asseq: Malik Brøns, KNR
Sumiiffinni amerlanerni pileqqaarfigisatut qinngornerit
Aatsitassarsiornermi piiagassat qanoq uranitaqartigisinnaanissaata killeqarnissaa Naalakkersuisut siunnersuutigaat.
Tassalu uraniunngitsumik piiarusuttoqartillugu piiarneqarusuttut agguaqatigiisillugu tonsimut 100 gramimit, 100 ppm-imit, oqinnerusumik uranitaqarpata, misissueqqaarnerit, ujaasinerit piaanerillu inerteqqutaanavianngillat.
Pinngoqqaatimmi ulorianartunik qinngornillit nunatsinni sumiiffiinni amerlanerni nunap ataaniipput.
- Pileqqaarfigisatut qinngornerit sumiiffinni amerlanerniimmata, 100 ppm-imut killeqartitsiniarpugut, Naaja Nathanielsen oqarpoq.
Kuannersuarni saffiugassat 300 ppm-ip missaannik uranitaqarput, 800 ppm-illu missaannik thoriummitaqarlutk.
Tamatumalu saniatigut politikerit imminnut ataatsimik periarfissiiniarput. Inatsisissatut siunnersuut ulorianartunik qinngornillit allat inerteqqutigilernissaannut periarfissaqartitsivoq.
