'Aatsaat taama ilungersunartigivoq' – naalakkersuisut avataaniit tatineqarnitsinnut piareersarput

Naalakkersuisut siulittaasuat Jens-Frederik Nielsen naalakkersuisunngortut nutaat pillugit, inatsisartut upernaakkut ullumi ataatsimiilerneranni oqaaseqarpoq.

Naalakkersuisoqatigiit nukittunerpaamik inissikkumallugit naalakkersuisut nutaat ivertinneqartut, Jens-Frederik Nielsenip oqaatigaa.

Inuit misilittagallit

Aningaasaqarnermut maanna naalakkersuisunngortoq taassuma naalakkersuisoqarfik siornatigut paarinikuugaa naalakkersuisut siulittaasuata erseqqissaatigaa.

- Aningaasaqarnermut maanna naalakkersuisunngortoq taassuma naalakkersuisoqarfik siornatigut paarinikuuaa. Ilisimasaqarfigivaa, aamma misilittagartuujuvoq, Jens-Frederik Nielsen Aqqaluaq B. Egede(IA) pillugu oqarpoq.

Upalungaarsimanermut naalakkersuisoqarfimmik sooq pilersitsinersoq aperineqarami, Jens-Frederik Nielsen ima akivoq:

- Upalungaarsimanermut apeqqut ukiuni kingullerni annertusiartuinnaavippoq, aamma ukioq kingulleq avatitsinniit tatiniarneqarnitsinni upalungaarsimanikkut suleqatigiinneq Danmarkimut allanullu annertusarneqaannaavippoq. Taamaammat aamma tassani akisussaaffiit annertusiartorput, aamma inuiaqatigiinni piareersimanissarput taanna suli pingaarnerusoq tamatta takusinnaavarput.

Avataanit tatineqarneq sillimaffigineqartariaqartoq

Nunanut allanut naalakkersuisoqarfimmut tunngatillugu malunnaatilimmik paarlaattoqartoq siulittaasup erseqqissaatigaa.

Múte B. Egedemmi(IA) Vivian Motzfeldtip nunanut allanut naalakkersuisutut akisussaaffigisimasaa tatineqaleruttornerup nalaani akisussaaffigilerpaa. Naaja H. Nathanielsenip akisussaaffigisimasaasa ilaat inuussutissarsiorneq aatsitassanullu akisussaaffiit taassuma aamma akisussaaffigilissavai.

- Nunanut allanut naalakkersuisunngortoq akisussaafferujussuarmik kivitsisussaavoq. Aamma piffissami matumani nunarsuarmi toqqissisimaffiunngitsumi nunarsuarmilu sorsuttut akornanni maannakkut inuunitsinni naalakkersuisoq taanna maannakkut immikkut ittumik ulapitsitsitaasussaavoq. Taannalu akisussaaffik kivissinnaagaa qularineqanngilluinnarpoq.

- Pissutsit maannakkut isigigutsigit, nunanut allanut naalakkersuisoqarfik pingaartorujussuarmik inissisimavoq. Avatitsinnit tatiniarneqarnerput sakkortuvoq. Taannalu pisussaaffiliivoq, suli annerusumik nukittuumillu nunanut allanut isumaqatigiinniarnerit ingerlassagigut. Taamaammat pissusissamisoortinneqarpoq, suleqatigiinni misilittagartooq, aamma politikkikkut annertuumik kivitsereertoq, akisussaaffimmik angisuumik peqareertoq taanna ingerlassagaa.

Donald Trumpip nunatsinni politikkimut tunngasuni arlaleriarluni oqaaseqartarnera Jens-Frederik Nielsenip aamma oqaaseqarfigillatsiarpaa:

- Sunniuteqartorujussuuvoq. Ilaatigut ima nipilerniarneqartaraluarpoq, tatiniarneqanngitsugut, ajortumik piniarneqanngitsugut. Kisianni eqqortoq unaavoq, nunatta inissisimaffia, avataaniillu isigineqarnera aatsaat taama ilungersunartigivoq.