Aasianni politiit inuit toqutsisoqarsimaneranut suliamut atatillugu paasissutissiinerannik nersualaaraat
Aasianni politiit angut 27-nik ukiulik toqutsisimasutut pasillugu ippassaq sisamanngornermi tigusaraat.
Suliaq niviarsiaqqap aqqaniliinnarnik ukiullip toqungasup Aasianni KJ Greenland Aasiaat aamma Wille Brandsvejip akornanni majuartarfinni sapaatip-akunnerata siuliani tallimanngornerup unnuaani nassaarineqarneranut tunngavoq.
Taanna uumasoq kingullermik sisamanngornermi unnukkut takuneqarpoq.
Angut Qaasuitsup Eqqartuussiveqarfiani sisamnngornermi unnukkut inatsit tunngaviusoq naapertorlugu killisiorneqarami ulluni 27-ni tigummigallagassanngortinneqarpoq.
Politiit pisortaata tullersortaata, Gideon Quistip innuttaasut suliamut atatillugu ikiuunnerat nuannaarutigalugu tusagassiuutinut nalunaarummi oqaatigaa.
- Innuttaasut allallu suliamut atatillugu paasissutissanik tapersiinermut ikiuunnerat politiit suliamik ilungersunarluinnartumik misissueqqissaarnerannut pingaaruteqartorujussuuvoq.
AAMMA ATUARUK Angut aqqanilinnik ukiulimmik toqutsisimasutut pasineqarluni tigummigallagassanngortinneqartoq
- Paasissutissarpassuit misissueqqissaarnermi takkussuuttut angutip 27-nik ukiullip ippassaq tigusarineqarnissaannut iluaqutaangaatsiarnerat qularutissaanngilaq.
Qaasuitsup Eqqartuussiveqarfiani inatsit tunngaviusoq naapertorlugu killisiuineq matoqqatinneqarpoq. Taamaammat politiit suliamut atatillugu paasissutissat annikitsortaanik paasissutissiisinnaanngillat, suliarli suli misissuiffigineqartoq ilanngullugu oqaatigaat.
Suliami suli misissugassarpassuaqarpoq, minnerunngitsumillu ataqatigiissaarisoqarlunilu paasissutissarpassuit misissorneqassapput, taamaalillutik suliami atorneqarsinnaassallutik, politiit pisortaata tullersortaa oqarpoq.