Aasiammiut kommune aveqquaat
![](/sites/default/files/styles/image_934x467/public/article_images/tunge_skyer_over_aasiaat_-_foto_af_hans_haagen_larsen_aasiaat_630_2.jpg?itok=E4T1UuMU)
Innuttaasut 40-t missaanniittut Aasiaat katersortarfianni ippassaq pingasunngornermi apriilip 18-ianni tusarniaanermi peqataapput. Tusarniaanermut qaaqqusisuuvoq Qaasuitsup kommunalbestyrelseani Kommuni pillugu suleqatigiissitaq, partiinit tamanit ilaasortaaffigineqartoq.
Qaasuitsup kommunalbestyrelseani ilaasortat marluusut siorna siunnersuuteqarput, Qaasuitsup kommunia marlunngorlugu avinneqassasoq, Qeqertarsuup Tunuani kommuneqalerluni Avannaanilu kommuneqalerluni.
Siunnersuullu aallaavigalugu suleqatigiissitamik matuminnga pilersitsisoqarpoq, kommunerujussuanngortitsisimanerup kingunerisaanik innuttaasut atugaannik tusarniaasussamik. Tusarniaanerlu taanna aallarnerlugu Aasianni ippassaq tusarniaasoqarpoq.
Tusarniaanerup aallartinnerani Kommuni pillugu suleqatigiissitap kisitsisit assigiinngitsut takutippai, kisitsisit kommunerujussuanngortitsitsinerup kingunerisaanik, ilaatigut allaffissornermi, utoqqaat, meeqqat inuusuttullu sullinneqarnerisa iluini pitsanngoriataasunik takutitsisut.
Taamaakkaluartorli innuttaasut tusarniaanermi peqataasut qularnaatsumik isumaqarput, kommunerujussuanngortitsineq sumilluunniit pitsaaquteqanngitsoq.
- Sullissineq ataatsimut isigalugu ajorseriarujussuarpoq. Kommunemut saaffiginninnikkut ikiorniarneqartarneq ajorseriarujussuarpoq, tassami saaffiginnissutit ilarparujussui illoqarfinnit allanit aqunneqartalerput.
- Pissutsit ajorseriarnerinut ilaatigut pissutaasoraarput nutarterinermi sulisut ataasiakkaat suleriusissaannik pilersaarusiortoqarsimarpasinngimmat, taamaalillunilu suliassat ilaatigut suuneri naluneqartarlutik, Aasianni innuttaasoq Karl Lundblad, eqimattakkaarnermi suleqatini sinnerlugit oqaaseqarnermini taama oqarpoq nangillæunilu:
- Avataaniit aqunneqartutut sunniuteqarsinnaanngitsutullu misigisimavugut, soorlu nunasiaataanerup nalaani pissutsinut uteqqilluni. Misigisimavugut Aasianni politikereeruttoq, tassami taakku takuneq ajorpavut. Qanimut oqartussaaqataaneq tammarsimavoq, Karl Lundblad, taama oqarpoq.
Innuttaasunik tusarniaanermi eqimattakkaarluni sulereernermi saqqummiussinerup takutippaa, eqimattat pinngitsoqaratik isumaqartut, kommunerujussuanngortitsineq pitsaaquteqanngitsoq, Qaasuitsullu kommunia avinneqartariaqartoq.
Innuttaasut misilittakkatik tunngavigalugit isumaqarput suliffissaaleqisut amerleriarsimasut, sanaartornerit ikileriarsimasut, kommunemiit paasissutissiisarneq pitsaanngippallaartoq, utoqqarnut, innarluutilinnut meeqqanut inuusuttunullu sullissineq ajornerulersimasoq, kiisalu politikerit innuttaasullu akornanni susassareqatigiinneq tammarsimasoq, taassumalu kingunerisimagaa inuit oqartussaaqataanerisa killeqalersimanerat.
Qaasuitsup kommuneani borgmesteri, Jess Svane, oqarpoq tusarniaanermi innuttaasut oqariartuutaat katersorneqassasut, kommunalbestyrelsellu aasaru juunimi ataatsimiinnerani saqqummiunneqarumaartut, tassanngaanniillu kommuni pillugu akisussaasut isummersornerat aallartissasoq.
Jess Svane aperaarput, innuttaasut amerlanerussuteqarluartut isumaqarpata kommunep avinneqarnissaa pisariaqartoq, tamanna siunertaralugu kommunalbestyrelse suliniuteqalerniarnersoq, taannalu akivoq, tusarniaanerup kingorna akisussaasut tunngavissaqalissasut aaliangiinissaq siunertaralugu isummernissamut, ima paasillugu, tusarniaanermi paasisat sakkutut atorneqassasut.