Aarrup niaquata saarnga tuugaalik Danmarkimi arnap pigiinnarsinnaagaa
Danmarkimi arnap aarrup niaquata saarnga Kalaallit Nunaanniit Danmarkimut unioqqutitsilluni nassiussimasani pigiinnarsinnaagaa, Danmarkimi Odensemi eqqartuussivik aalajangerpoq.
Odensimi eqqartuussivik nutaarsiassaqartitsivimmut Ritzauimut taama ilisimatitsivoq.
Aarrup niaquata saarnga arnamit unnerluussamit arsaarinnissutaassasoq, unnerluussisussaatitaasut piumasaraat. Arnarli taanna Odensemi eqqartuussivimmit pinngitsuutitaavoq.
Arnap taassuma pillaatitut akiliisinneqartussanngornera atorunnaassasoq, Odensemi eqqartuussvik aamma aalajangerpoq.
Danmarkimi eqqartuussiviit suliat ilaanni pillaammik atorunnaarsitsisoqarnissaanik aalajangersinnaapput. Soorlu pinerluuteqarnermik suliani sakkukilliisinnaasoqarsinnaatillugu taamaaliorsinnaapput. Arnap taassuma eqqartuussaanerata atorunnaarsinneqarneranut peqqutaasoq, Odensemi eqqartuussivimmit erseqqissarneqanngilaq.
Arnaq taanna 64-inik ukiuliusoq 2023-p aallartinneraniit qaammatit pingajuat avillugu Kalaallit Nunaanniissimasoq, unnerluussummi Ritzauip takusimasaani allaqqavoq.
Arnaq taanna Danmarkimut utertussanngorami akuerineqartigani aarrup niaquata saarnga pequtinut nassiussassaminut ilanngussimagaa, unnerluussummi allaqqavoq.
Arnap taassuma pequtini najukkaminut apuunneqartussatut nalunaarutigalugit nassiussimagai, unnerluussummi allaqqavoq.
Aaveq meterit pingasut sinnerlugit angissuseqalersinnaasoq tuugaavilu centemeterit 75-it tungaannut takitigilersinnaasut, paasissutissanik ujalerfissami lex.dk-mi allaqqavoq.
Aarrup niaquata saarngata arnamit unnerluussamit arsaarinnissutaanissaa Odensemi eqqartuussiviup sooq atorunnaarsinneraa erseqqissarneqanngilaq.
