Alaskami tuugaanik eqqumiitsuliortut eqqornerlunneqartut

Sikup aakkiartornera ilutigalugu Aarrunik piniarneq ajornarsiartorpoq, Alaskap kippasissortaani piniartoq Perry Pungowiyi oqarpoq.

Taanna aarrinik piniartarlunilu aarrit tuugaavinik eqqumiitsuliortarpoq, taamaammat tassunga eqquinerlunneruvoq. 
Tamannalu Alaskami naggueqatigiinnut inunnut aarrit tuugaavinik eqqumiitsuliortartunut eqquinerluppoq. 

Nagguaatsup tuugaavi nunarpassuarni inerteqqutaapput. Nunamut eqqussuuteqqusaanngillat eqqumiitsuliareqqusaanatillu. 

Tamanna eqqumiitsuliortumut eqqumiitsuliaminik tuniniaanissaminut ajornartorsiortitsivoq, aarrillu tuugaavinik eqqumiitsuliornissaminut aamma ajornartorsiortitsilerluni.

- Aningaasaateqanngikkutta namminneq nerisassatsinnik piniarusunneruvugut pisiniarfimmut pisinianngikkaaluarluta, Perry Pungowiyi Arctic Todaymut oqarpoq.

Aarrit nungutaanissaminnut ulorianartorsiunngillat

Aarrup tuugaavanik eqqumiitsuliortarneq ileqqutoqaavoq piorsarsimassutsimullu tunngassuteqarluni. Tamatuma saniatigut Saint Lawrencep qeqertaani nunaqarfinni Savoongami Gambellimilu piniartunut aningaasanik isertitaqarnissamut pingaaruteqarluinnarluni. 

USA-mi naalagaaffiit qassiiusut California, Nevada Hawaii-ilu ilanngullugit tuugaanik tuniniaanermut inerteqquteqarput. Taakkulu saniatigut naalagaaffiit aqqaneq-marluk tuugaanik inerteqquteqalersinnaasunik inatsisiliuleruttortut, nittartakkaminni erseqqissarpaat. 

Ajoraluartumilli aarrit tuugaavisa nagguaatsut tuugaavinit assigiinngissutaat inatsisitigut immikkoortinneqarsinnaanngillat, naak aarrit tuugaavi tuniniarnissaat inerteqqutaanngikkaluartoq.

Tassami aarrit nungoratarsinnaasuniinngillat. Alaskamilu aarrit amerlasoorujussuupput. Beringstrædemi Beringshavimilu aarrit millionit sisamararterutaannik amerlassuseqarnissaat missiliorneqarpoq. 

Aarrit tuugaavinik eqqumiitsuliorneq Alaskami innuttaasunut kulturikkut isumalerujussuuvoq, qangaaniillimi ileqqutoqaammat. 
Peqatigiiffimmi siulittaasup Melanie Bahnke oqarnera naapertorlugu, ileqqutoqqap pingaaruteqassusia oqaasertaleruminaappoq. Allaammi nipilersoqqusaajunnaarnermut sanilliunneqarsinnaanerarpaa.

- Nipilersornertaqanngitsumik inuullutit takorloorsinnaaviuk? Tassa uagutsinnut taamatut misigisimanarpoq, eqqumiitsuliagut tuniniarsinnaajunnaaratsigit, Arctic Todaymut oqarpoq.