Aaqqiissutaasinnaasumik suli nassaartoqanngilaq

- Isumaqatigiinniarneq una meeqqanut atuartunut attuumassuteqarluinnarpoq, taamaattumilluuna aaqqiissutissanik massakkorluinnaq nassaartariaqartugut, aaqqiissutissarli suussanersoq maannangaaq oqaatigisinnaanngilara, Maliina Abelsen oqarpoq.

Ilinniartitsisut kattuffiata, IMAK-ip Namminersorlutik Oqartussat KANUKOKA peqatigalugu isumaqatigiinniarnerat ippassaq ajalusoorluni unittoorpoq. Taakku isumaqatigiinniarlutik aallartinnginnerini isumaqatigiinniarnermut akisussaasoq, Aningaasaqarnermut Naalakkersuisoq, Maliina Abelsen oqarpoq, isumaqatigiinniarnerit ajalusuussappata, illuatungerisami piumasaqaataasa ilaannut isumaqatigiinniartuni akuersisinnaatitaagaluartut.

- Isumaqatigiinniarnerup nalaani susoqarsimanersoq oqaaseqarfigisinnaanngilara, oqaatigiinarsinnaalluguli, aallartitagut illuatungigisatta piumasaqaataasa ilaannut akuersisinnaatitaanissaannik periarfissillugit isumaqatigiissikkiartoraluaratsigit.

Isumaqatigiinniarnermut akisussaasoq, Maliina Abelsen oqarpoq.

Isumaqatigiinniarnerit ajalusoornerisa kingorna Aningaasaqarnermut Naalakkersuisoq allatut iliornissamik ujartuilluni aallartereerpoq, oqaloqatigeqqitassaalu tassaapput Nunap immikkortuini borgmesterit sisamaasut.

- Borgmesterit qanoq naliliineri tusarusuppara aamma tusarusuppara qanoq ingerlariaqqittoqarnissaannik siunnersuutissaqanersut.

Maliina Abelsen-i nammineerluni aaqqiissutaasinnaasunik oqaaseqarsinnaagikkallarnerarpoq, soorluttaaq isumaqatigiinniarnermi illuatungeriit, IMAK-ip siulittaasua, Sivso Dorph aamma Namminersorlutik Oqartussat isumaqatigiinniarnermi pisortaat, Rasmus Semback Olsen pisumut oqaaseqarsinnaannatik oqaatigalugu.

Maliina Abelsen-ip isumaqatigiinngissutaasoq kingumut qiviarluni ima oqaatigaa.

- Ilinniartitsisut ilinniarsimasut sulisinnerulernissaat siunertaralugu isumaqatigiissitsinianngilagut, ilinniartitsisulliuku ilinniartsitsinerulernissaat siunertarigipput. Ajuussaarutigiinnarsinnaavara isumaqatigiissitsiniarneq iluatsinngitsuuvimmat.

Isumaqatigiinniarnermut akisussaasuusoq, Aningaasaqarnermut Naalakkersuisoq, Maliina Abelsen taama oqarpoq.