Aningaasanut inatsisissamut isumaqatiginninniarnernut peqataarusupput
Nunatta ilaasortaatitai isumaqatiginninniarnissamut piareeqqapput, qaaqquneqarnissartillu kissaatigalugu, Savalimmiormiulli tassunga atatillugu tunuarsimaarnerupput.
Aningaasaqarnermut ministeri Claus Hjort Frederiksen aningaasanut inatsisissamut atatillugu isumaqatiginninnialerpat isumaqatiginninniarnissamut peqataaniarnertik Siumup Inuit Ataqatigiillu kissaatigaat.
Aamma atuaruk Aajap qallunaat aningaasaqarnermut ministeriat tuavisaarpaa
Arlaannaalluunniilli isumaqatigiinniarnissamut suli qaaqquneqarsimanatik. Taama pisoqarpoq naak partiit Folketingimi ilaasortaatitaqartut allat qaaqquneqarnikuugaluartut.
Inuit Ataqatigiit isumaqatiginninniarnermut qaaqqusaanissaannut ammanini Claus Hjort Fredeiksenip siusinnerusukkut oqaatiginikuuaa, taama oqarpoq naak Atlantiku avannaamiut isumaqatiginninniarnissamut nalinginnaasumik peqataatinneqarneq ajoraluartut.
Aaja Chemnitz Larsenip tamanna apeqqusernikuuaa, partiimmi Folketingimi ilaasortaatitaqartut naligiimmik pineqarnissaat taassuma pissusissamisoorsorigamiuk.
Aamma atuaruk Aajap Aleqallu suleqatigiillutik eqqartuussiveqarnermi pissanngorsaanissaq sulissutiginiarpaa
Savalimmiormiulli allatut isumaqarput. Savalimmiormiummi isumaqatiginninniarnissanut akuliutinnginnissaat pissusissamisoornerusssasoq, Sjurdur Skaalep, Socialdemokratit sinnerlugit Folketingimut ilaasortap, Magni Argellu, Republikanerineersup, oqaatigaat.
- Danmarkimi ilaasortanut naleqqiullugu tunuliaquttagut allaanerupput, aamma qinersisigut Savalimmiuni namminneq akileraartarput, aamma qallunaat akileraartartut uagut suliassaatitsinnut aningaasartuutit ilaat akilerusuttarmatigit, namminneq taamaaliorusunnerannik peqquteqarpoq. Taamaammat tamakkununnga akuliuterusunnginneruvugut, Sjurdur Skaale KNR-imut oqarpoq.
Aamma Magni Arge, Republikanerineersoq, taama nipeqarpoq:
- Savalimmiuni imminut nappattumik aningaasaqalernissatsinnut periarfissaq oqaloqatigiissutiginissaannik aningassaqarnermut ministeri neqeroorfiginikuuara. Kisianni isumaqatigiinniarnerussanngilaq, taanna oqarpoq.
Aamma atuaruk Danskit aningaasanut inatsisissaat kalaallinit piffissaq kingulleq sunniuteqarfigineqartoq
Danmarkip Savalimmiunut ataatsimoortumik tapiissutai aningaasat Danmarkimi nalikilliartornerannut naapertorlugu iluarsineqartaraluarput, Soorlu Nunatsinnut tapiissutit atatsimuoortut taama pineqartartut.
Savalimmiulli Naalakkersuisuisa tapiissuti aningaasat nalikillairtarnerannut iluarsineqartarunnaarnissaat kissaatiginikuuaat. Savalimmiut Danmarkimit aningaasaqarnikkut isumalluuteqannginnerulernissaa siunertaralugu taamaaliorusupput
