Aallakaatitat kipisaqattaarnerat kipiluttunartoq

KNR-ip aallakaatitai piffissami kingullermi kipisaqattaartarput. Telemi teknikkikkut ajornartorsiorneq tamatumunnga pissutaavoq. Taamaattoqarneralu KNR-ip pisortaata, Karl Henrik Simonsenip ajuusaarutigaa.

- Piffissami kingullermi, sapaatit akunneri arlerlugit tv-kkut radiokkullu aallakaatitsisarneq kipiluttunarpoq, Karl Henrik Simonsen taama oqarpoq.

Radio, DR-ip kanaalii TV-lu ajoquteqarsimasut, taassuma aamma oqaatigaa.

AAMMA ATUARUK TELE-POST-ip attaveqaatip ajoquteqarnera ajuusaarutigaa

Tamannali KNR-ip pisuussutiginngikkaa, Karl Henrik Simonsenip erseqqissaatigaa.

- Maani illuminngaanniit signali Telemut nassiussarput ajoquteqanngitsoq takusinnaavarput. Teleminngaanniilli ingerlaqqinnera, sinerissamullu siammarternera ajoquteqarpoq, Karl Henrik Simonsen oqarpoq.

Telep KNR-ip aallakaatitaanik kipisaqattaartitsisartunik ajornartorsiuteqarlutik juulip aappaanni paasisimagaa, Telep attaveqaqatigiinnermut pisortaa, Arnakkuluk Jo Kleist nassuiaavoq, ajornartorsiutillu assigiinngitsuusut oqaatigalugu.

AAMMA ATUARUK Tele Postip TV-mut radiomullu attaveqaatit aaqqinniarsarigai

Ajornartorsiutilli arlallit iluarsiivigineqareersut taanna oqarpoq.

- Ajornartorsiutit suli aaqqitassat qanilliartuaarpagut. Kisianni kingulliit suli nassaarinikuunngilagut, Arnakkuluk Jo Kleist oqarpoq.

Ajornartorsiortitsisulli tamarmik qaqugu iluarsiivigineqarnissaat oqaatigisinnaanngilaa.

- Aaqqiissuteqaraluarluta, aaqqiissutit tamarmik ajornartorsiutillu tamarmik nassaarinikuunnginnatsigit taamaattumik tusarnaartartut isiginnaartartullu taamatut kipisaqattaarnera suli takusinnaassavaat tusaasinnaassallugulu, Arnakkuluk Jo Kleist oqarpoq.

Ajornartorsiutit iluarsiivigineqareerpata Telemit nalilersuiumaarput inassuteqarumaarlutillu.