Tele Postip TV-mut radiomullu attaveqaatit aaqqinniarsarigai
TV-mut radiomullu attaveqaatit kipisaqattaartut innuttaasut malugisimavaat. Attaveqaatit kipisaqattaarnerinut suna pissutaanersoq Tele Postip paasinialeruttorpaa.
Allattoq Inge S. Rasmussen
juulip 14-at 2017 10:11
TV-mut radiomullu attaveqaatit piffissami kingullermi kipisaqattaarnerat atuisut maluginiarsimassavaat, tassa nuna tamakkerlugu TV-mut radiomullu attaveqaatit KNR1, KNR2, DR1, DR2, DR Ultra KNR FM-imullu attaveqaatit kipisaqattaarmata.
Attaveqaatit kipisaqattaarnerat takkuttarlunilu peeruttarpoq, ajoqutaasullu nassaariniarnissaa ajornakusoorsimaqaaq, sulilu taamaalluni:
- Suligasuartussanik Tele-Post-imi pilersitsivugut, ajoqutaasup iluarsiniarsarinissaanik peqatigiillutik suliaqartussanik. Ajornartorsiut pilermalli attaveqaatit aalaakkaasunngorteqqinniarlugit iluarsiissutit assigiinngitsut suliarisimavagut, immikkoortortami aqutsisoq Kim Hammond Zinck oqarpoq.
Tele-Post, ajoqutaasup iluarsineqarnissaanut atatillugu KNR-imik oqaloqateqarpoq.