Aalisartunut nutaarsiassaq pitsak: UK-mi killilersugaanngitsumik niuerneq pillugu isumaqatigiinniarnerit aallartipput

Tuluit Nunaat EU-mit animmalli aalisarnikkut niuffaffimmut pingaaruteqaqisumut tassunga tuniseqqinnissaq nalornissutaasimavoq.

Kalaallit Nunaanni aalisarnikkut suliffeqarfiit killilersugaanngitsumik niueqateqarsinnaanerannut taarsiullugu nioqqutissat akileraarusersorneqarput, taamalu nunarsuarmi kinguppannut qalatanut qalipaajakkanullu niuffaffiit annersaannut avammut tunisineq, aammalu Kalaallit Nunaannut saarullinnik saaniiakkanik niuffaffimmut pingaaruteqartumut annikillilluni.

Kisianni sisamanngomat Naalakkersuisut nalunaarutigaat qanittukkut niueqatigiinissamik Tuluit Nunaannut isumaqatigiinniarnerit aallartissasut.

Isumaqatigiissut nunanut taakkununnga tamanut iluaqutaasoq 

Tusagassiutinut nalunaarummi Naalakkersuisut siulittaasuat Múte Bourup Egede (IA) oqaluttuarpoq:

- Nunatta marluk akornanni killeqanngitsumik niuersinnaanermik isumaqatigiissut nutaaq tunisassiornitsinnut iluaqutaassaaq illugiillunilu attaveqatigiinnitsinnut iluaqutaasumik sunniuteqassalluni. Isumaqatigiinniarnerit, aamma toqqaannartumik atassuteqarnitta nassatarisinnaasai periarfissat misissussallugit qilanaareqaavut.

Sisamanngormat Danmarkimi tuluit aallartitaannik naapeqateqarnerup kingorna nalunaarut takkuppoq.

AAMMA ATUARUK Kinamut tunisinermi ilungersunartorsiorujussuarneq: Qalerallit raajallu millionikkuutaanik nalillit uninngaannartut amerliartortut

Isumaqatigiinniarnerit qaqugorpiaq aallartissanersut nalunaarutigineqanngilaq, kisanni siunissami qaninnerpaami pissapput. Nalunaarummi aamma aallassimavoq:

- Killilersugaanngitsumik niueqatigiinnissamik isumaqatigiissummi kalaallit aalisaakkanik aamma qalerualinnik nioqqutissiaasa UK-mit ilanngaaserinermi akitsuutaasa UK-mut eqqussinermi annikilisinneqarnissaat imaluunniit peernissaat anguniarneqarpoq. UK niuffaffittut pingaarutilittut inissisimanerani Kalallit Nunaannut pingaartuuvoq nunatta taaku akornanni niuernikkut atassuteqarnerit pitsaasut atuutilerseqqissallugit.

Isumaqatigiinniarnerit qaamatikkaartut 

Isumaqatigiissut piviusunngussappat nunanut allanut niuernermut alloriarnerussaq annertooq,tassami Kalaallit Nunaata killeqanngitsumik nunamut allamut niuersinnaaneranut  siullersarissavaat.

Nunat Allat Pillugit Naalakkersuisoqarfimmi pisortaaneq Sermitsiamut Mininnguaq Kleist oqarpoq isumaqatigiissuteqarnissaq pillugu isumalluarluni.

Siunissami kalaallit atorfilitaat tuluit atorfilittaannik qaammatikkartumik ataatsimeeqateqartassapput.