Aalisartoq ajunaartoq pikkorissartinneqarsimanngilaq
Kilisaammit, Tasiilami East Greenland Codfishimit pigineqartumit, ajunaarneq, Imaani Ajunaartoqartillugu ataatsimiititaliap misissuivigereerlugu nalunaarusiaani tamanna atuarneqarsinnaavoq.
Kilisaat Islandimiit ammassanniarluni aallalersoq angutip kalaallip 31-nik ukiullip qaammat ataaseq sioqqullugu ikkivigaa.
Erika lastini ulikkaarmat Helguvikimut februaarip ulluisa 27-anni unnukkut usingiariartorpoq. 31-nik ukiulik qalorsuit ujarattaannik oqimaaluttanik katersitilluni angallat uerujussuarmat qalorsuarnit eqqortilluni avammut nakkarpoq. Ajunaarneq pillugu nalunaarusiami allassimasut naapertorlugit angut ilisimajunnaarsimagunarpoq. Kilisaammi qassussualerisoq allunaasamik qitermiulerluni imaanut pissippoq, aalisartorlu minutsit arlaqanngitsunnguit qaangiummata qaqillugu, uummarsaanerigaluarli iluatsinngilaq.
Nalunaarusiamilu naliliinermi tassa takuneqarsinnaavoq, ajunaartoq upalungaarsimanissamut pikkorissarsimagaluarpat annanniuteqarsimagaluarpalluunniit allatorujussuaq pisoqarsimassagaluartoq. Aamma paasineqarpoq ajornartoornermi paasissutissat islandimiutuinnaq allassimasut. Annaassiniarnerli uummarsaanerlu taama sukkatigisumik pisimammat inuttat nersorneqarput.
East Greenland Codfishimi ulluinnarni aqutsisoq, Ejnar Halsson, Radioaviisimit ullumi attaveqarfigaarput. Ajunaarneq alianartoq taassuma ajuusaarutigaa, qinnutigaluguli Imaani Ajunaartoqartillugu ataatsimiititaliap misissuinerata inerneri
naammassippata annerunerusumik oqaaseqarsinnaanerluni. Ilisimatitsissutigaali kilisaammi inuttat tamarmik upalungaarsimanissamut pikkorissartinneqareersut.
Kalaaleq inuusuttoq alla aalisariummut anngajaamut ikeqqammerluni siorna aamma ajunaarpoq. Raajarniummik Markusimik piginnittoq, Qajaq Trawl, arlaleriarluni sumiginnaasimasutut 40.000 koruuninik taamani akiligassinneqarpoq, suliffimmi maleruagassanik naleqquttunik ilaatigut peqarsimanngimmat.
Kilisaat Erika ukiut marluk matuma siorna kalaallinit pigineqalerpoq, islandimiunilli qulingiluanik suli inuttaqarluni. Igasoq, qassussualerisoq qaamiullu - angut ajunaartoq ilanngullugu - kalaaliupput.
