Aalisarnermut ingeniørinngortoqarsinnaalerpoq
Aalisarnermi suliallit politikkerillu immap pisuussutaanik paasissutissanik ilinniarnissanillu sivisuumik ujartuiuarput. Septemberilli aallaqqaataaniit 2019-imi diplomingeniørinngornianik, aamma aalisarnermut ingeniørinngornianik taaneqartartunik Sisimiuni Center for Arktisk Teknologi, ARTEK-ip, ataani ilinnialerniartut aallartissinnaanngussapput.
Tassani ilinniartut Kalaallit Nunaanneersut Danmarkimeersullu 25-t ukiuni sisamani aalisarnermi piniutitigut atortorissaarutit, aalisakkanik piujuartitsiniarnermik tunngaveqartumik pisarineqartarnissaannik qulakkeerinneqataasussanik sammisaqarnerit, aalisakkanik qalerualinnillu tunisassiornermi ingerlatseriaatsit kiisalu aalisarnermi aqutsineq aammalu nutaaliornerit periarfissarsioriaatsit ilinniassavaat.
AAMMA ATUARUK Jensenip aalisarnermut inatsit oqallisaaqisoq naammassisussaassagaa
Ilinniarnerup annersaa Kalaallit Nunaanni ingerlanneqassaaq ilaalu DTU-mi Danmarkimi. DTU Aquami suliami aqutsisoq Nina Qvistgaardip Kalaallit Nunaanni aalisarnermut tunissassiornermullu tunngasunik ilinniarfeqalernissaa nuannaarutigaa.
- Ilinniagaq Kalaallit Nunaanniit sivisuumik kissaataasimasoq piviusunngoqqajaalerpoq. Pingaartumik Kalaallit Nunaanni aalisarnermik inuussutissarsiuteqartut suliffissuit ilinniartitaanernik taama ittunik pisariaqartitsisimapput, taamaammat soqutigisaqartut kissaataat pisariaqartitaallu naapertorlugit taakkulu qanimut suleqatigalugit ilinniartitaanerup ilusissaa naniniarsimavarput. Ilinniarneqarsinnaalerumaartoq Namminersorlutik Oqartussat ilinniartitaanernut aammalu aalisarnermut periusissiaat naapertorlugu taakkuninngalu ikorfartueqataasussatut ilusiligaavoq, tusagassiuutinut nalunaarummini taamak oqarpoq.
DTU Aquami ilinniarfissaq nutaaq Danskit Naalagaaffiannit aningaasalersorneqassaaq Namminersorlutillu Oqartussanit tapiiffigineqarluni.
