Aalisarnermut ataatsimiititaliap siulittaasua: Naalakkersuisumut tatiginnikunnaarpugut

Kingullermik tatiginnikkunnaartoqarmat ukioq ataaseq sinnerlugu qaangiuppoq. Maannali Aalisarnermut, Piniarnermut Nunalerinermullu Ataatsimiititaliap siulittaasua Aalisarnermut Naalakkersuisumut, Jens Immanuelsenimut tatiginnikkunnaaqqilluni nalunaaruteqarpoq.

Ataatsimiititaliap tusagassiuutinut nalunaarutimini ”Aalisarnermut, Piniarnermut Nunalerinermullu Naalakkersuisoq tatigiunnaarparput”-mik qulequtsersimagaa atuarneqarsinnaavoq. Nalunaarut aalisarnermut ataatsimiititaliamit, Henrik Fleischerimit (S) atsiorneqarsimavoq, taamaakkaluartorli ataatsimiititaliamit kikkut naalakkersuisumut aamma tatiginnikkunnaarnersut erseqqissumik allassimanngilaq.

Henrik Fleischerip oqarnera naapertorlugu Demokraatit Jens Immanuelsenimut suli tatiginnipput. Demokraatit ataatsimiititaliami ataatsimik ilaasortaqarput. Ataatsimiititaliami ilaasortat Henrik Fleischer ilanngullugu arfineq-marluupput.

Henrik Fleischer napparsimanerarluni KNR oqaloqatigiumanngilaa. Ataatsimiititaliap siulittaasuata tullia, Aqqaluaq B. Egede ataatsimiititaliamilu ilaasortat sinneri KNR-imut aamma oqaaseqarusunngillat, taakku siulittaasoq innersuussutigaat, taannalu tassa napparsimalluni.  

Naalakkersuisup isumannani allanngortikkaa

- Ataatsimiititaliap ernummatigaa Naalakkersuisup pineqartup aalisarnermut inatsisissaq pillugu suliamik ingerlatsinera matoqqasorujussuarmik ingerlanneqartoq, aamma inuiaqatigiinni aningaasarsiornikkut sulisartoqassutsikkullu sunniuteqarluinnartoq torersumik ilisimatitseqatigiiffiusumillu ingerlanneqanngitsoq mianernarsigaluttuinnartoq, siulittaasoq, Henrik Fleischer allappoq.

Taassuma aalisarnermut aaqqissuusseqqinnerup suliarineqaleruttortup suliarineqarnera innersuussutigaa.

AAMMA ATUARUK Kielsen udpeger to nye naalakkersuisoq

- Suliassat aallartinneqalersaartut aallartinneqareersimasulluunniit pillugit Naalakkersuisup paasissutissiissutaanik ataatsimiititaliaq tigusaqaraangat sivitsunngitsoq Naalakkersuisoq isummaminik allannguisarpoq – eqqarsaatigillannguarnagu siusinnerusukkut ataatsimiititaliamut qanoq paasissutissiisimanini aammalu aalajangiisimaneq allanngortinneqarsimappat tamatuma kingorna ataatsimiititaliamut paasissutissiinnguarnani.

- Naalakkersuisut aalisarnikkut aaqqissuusseqqinnissaq pillugu politikkikkut siunnerfiat ataatsimiititaliamiit ilisimaneqanngilaq. Suut tamarmik isertuussamik ingerlanneqarput, naak politikkikkut siunertat isertuunnagit peqataatitsilluni ingerlanneqarsinnaagaluartut tamanna ulloq manna tikillugu pisimanngilaq.

Demokraatit: Pisuutitsiniaanerit tunngavissaqanngitsut

Demokraatit ”pisuutitsiniaanerit tunngavissaqanngitsut” oqaaseqarfigerusunngikkaat, partiip ataatsimiitialiami ilaasortaatitaata, Steen Lyngep tusagassiuutinut nalunaarummi ikinnerusussuteqarlutik oqaaseqaataanni allappoq.

- Demokraatini isumaqarpugut Aalisarneq pillugu Ataatsimiititaliarsuaq eqqissilluni sulinissaminut naggataatigullu aalisarnermut inatsisissatut siunnersuutissamut kaammattuuteqarnissaminut periarfissinneqartariaqartoq. Inatsisartut kaammattuutaajumaartunut isummernissaminnut naammattumik periarfissaqarumaarput, soorluttaaq amerlanerussuteqartunit taperserneqarumaartoq itigartinneqarluniluunniit.

AAMMA ATUARUK Derfor er der så stor udskiftning af naalakkersuisoq for fiskeri

- Peqatigitillugu Naalakkersuisut tungaannit aalajangersimaqqissaartunik naalakkersuinikkut piumasaqaateqartoqarsimannginnera aalajangersimasunilluunniit Aalisarneq pillugu Ataatsimiititaliarsuarmit inerniliisoqarnissaanik kissaateqartoqarsimannginnera pitsaasuuvoq.

Aalisarnermut naalakkersuisuusimasoq, Nikkulaat Jeremiassen (S) siorna apriilimi naalakkersuisuujunnaarpoq. Qaleralinniarnerup ilaani aalisapilunneq imaluunniit piujuartitsinermut tunngasut pillugit paasissutissat akerlianik paasissutissiisimaneranik ataatsimiititaliamit isornartorsiorneqarsimanera tunngavigalugu ilaatigut taamatut pisoqarpoq.

Ukiuni qulini kingullerni aalisarnermut naalakkersuisuusimasut arfineq-pingasuupput. Taakkunannga marluk marloriarlutik tassani naalakkersuisuupput.