Immikkut ilisimasalik: Taamaammat aalisarnermut naalakkersuisut taarseraapput
Aalisarnerup inuppassuit eqqortarpai, taamaammat aalisarnermut isummat assigiinngitsorpassuusut Rasmus Leander Nielsen oqaluttuarpoq.
- Salliunneqarsorisussaasarpassuupput aningaasarpassuillu pineqarlutik. Aalisarneq politikkikkut sakkortuumik isumaqarfinngortarpoq inuiaqatigiinnilu tamarmi killitsiaffiulluni, Rasmus Leander Nielsen oqarpoq.
2009-mit aalisarnermut naalakkersuisuusarsimasut:
Ane Hansen, (IA) 2009 - 2013
Karl Lyberth, (S) 2013 –2014
Finn Karlsen, (S) 2014
Karl-Kristian Kruse, (S) 2014 – 2016
Nikkulaat Jeremiassen, (S) 2016
Hans Enoksen, (PN) 2016 - 2017
Karl-Kristian Kruse, (S) 2017 - 2018
Erik Jensen, (S) 2018
Nikkulaat Jeremiassen, (S) 2018 – 2019
Jens Immanuelsen, (S) 2019 -
Tamanna Finn Karlsenimit ilisarineqarsinnaalluarpoq. Taanna marloriarluni aalisarnermut naalakkersuisuusarsimavoq, kingullermik 2014-imi tassani atuuffeqarluni. Finn Karlsen oqaluttuarpoq aalisarnermut naalakkersuisoq attaveqarfigineqarnerpaasartoq.
- Aalisarnermut naalakkersuisumut ulluinnarsiutaavoq saaffiginnittarneq taanna immaqa naalakkersuisut ilaannut artorsartitsilersinnaasarpoq, Finn Karlsen taama oqarpoq.
AAMMA ATUARUK Naalakkersuisunngortut marluk avammut nalunaarutigineqartut
Rasmus Leander Nielsenip oqaatigaa, aalisarneq pillugu isummat assigiinngitsorpassuummata aalisarnermut naalakkersuisup suliai eqqumaffigilluarneqartartut kukkunerlu kinguneqartinneqartarluni.
Tamatuma qaavatigut naalakkersuisup suliassarisartagai ajornakusoortorujussuusartut, adjunkti nassuiaavoq.
- Naalakkersuisoqarfik suliatigut piumasaqaateqartupilussuuvoq. Aalisarnerup suut tamaasa soorlu assersuutigalugu niuerneq aqqusaartarpai. Kalaallit Nunaanni inatsisiliorneq aalisarnermit aallaaveqarajupput. Soorlu Tuluit Nunaata EU-mit ilaasortaajunnaarpat raajanik niuernermi qanoq iliussaagut assigisaalu, Rasmus Leander Nielsen oqarpoq, nangillunilu aalisarnermut naalakkersuisoq akunnakusoortunik aalajangiiffigisassarpassuaqartartoq.
Ilaannilu naalakkersuisoq qanorluunniit aalajangeraluarpat, iluarinninngitsoqartartoq, Finn Karlsen nassuiaavoq.
- Nalunngilarput qanorluunniit pigaluarutta tamarmik isumaqatigisinnaasaannik susinnaanngilagut, peqqutigalugu tassani avataasiortullu sineriassiortullu immikkoorput taakkua piumasaat tamarmik naammassiniassagaanni assortuuttoqaqqajaasorujussuusarpoq, Finn Karlsen oqarpoq.
