Aalisarneq pillugu Ruslandimut isumaqatigiissut GA-p akuersaarpaa

GA-p isumaqatigiissut siunissaq ungasinnerusoq eqqarsaatigalugu qimerloorsimavaa, taamatullu isiginiaraanni isumaqatigiissummi suliniutit pitsaasut amerlapput. Oqimaaqatigiinngittoqarneranut peqqutaanerpaasoq tassaavoq aalisakkat qalerallillu akiisa assigiinngissutaat ukiuni kingullerni annertusiartupiloorsimanera.

-Aamma pingaarutilik tassaavoq kilisaatinik nerpiliorfittalinnik saarullinniarnermi paasisimasaqassuserput isumaqatigiissut iluaqutigalugu pigiinnarsinnaagatsigu ineriartorteqqissinnaallugulu, tassami Kalaallit Nunaata imartaani saarullittassiissutit ukiuni arlalinni annikitsuinnaasimammata. Saarulliit amerliartorunarmata tamatumuuna isumaqatigiissut uatsinnut pingaaruteqarpoq. Aamma aalisariaatsit assigiinngitsut aningaasartuutaasa katitigaanerat pingaarluinnarpoq, Aalisarneq aammalu Nunanut allanut tuniniaanermut Sulisitsisut ataatsimiititaliaanneersoq Henrik Leth naqissusiivoq.

GA-p tungaanit nassuerutigineqarpoq Ruslandip nunattalu akornanni isumaqatigiissut 2013-imut tunngatillugu iluaqutaasussaanngitsoq, aamma erseqqissaatigineqarpoq ukiuni aggersuni naligiissaarisoqanngippat isumaqatigiissutip iluarsineqarnissaa pissusissamisuussaq, taannami 1992-imi isumaqatigiissutaasimasumik pingaarnertut ingerlatitseqqiinerummat.

- Ukiuni aggersuni isumaqatigiinniarnissani oqimaaqatigiinnerusoqarnissaa sulissutigissavarput. Taamaaliunngikkutta nunat marluk akornanni illuatungeriilluni Ruslandimik isumaqatigiissummik atorunnaarsitsigaanni Kalaallit Nunaannut pitsaanerunersoq eqqarsaatigisariaqarparput. Pissutsilli maannakkorpiaq atuuttut eqqarsaatigalugit isumaqatigiissutip nunanut taakkununnga marlunnut nalilerujussuartut, aammalu 2013-imut pisassiissutinik paarlaasseqatigiinneq Kalaallit Nunaannut naammaginartutut, naalakkersuisoqarfiup naliliinera Sulisitsut isumaqatigaat,  Henrik Leth naqissusiivoq.