Aalisarneq pillugu EU-mi kommissæri tikeraalerpoq
Sisamanngorpat kommissærip Ilulissani Royal Greenlandip tunisassiorfia takuniassavaa taassumalu saniatigut umiarsuaq nakkutilliissut ilaaffigalugu Qeqertarsuup tunuani angalaarsinnaajumaarluni ilaatigut Kangiata sullua nunarsuarmi kingornussassat allassimaffianniittoq takuniassallugu.
Tamatuma kingorna Maria Damanaki Nuummukassaaq tassani Kalaallit Nunaanni aalisarsinnaanermut akuersissutinik aalisarnermullu nakkutilliisoqarfik ataatsimeeqatigissallugu. Taassuma saniatigut kommisærip Naalakkersuisut siulittaasuat Kuupik Kleist aamma aalisarnermut Naalakkersuisoq Ane Hansen ataatsimeeqatigissavai. Illuatungeriit EUp nunattalu isumaqatigiissutaat oqaluuserissavaat. Tassani ilaavoq imartat minguitsuunissaannut tunngasoq inuussutissarsiornikkut siuarsaanialeruttorfiup nalaani. Illuatungeriit qanimut aalisarneq pillugu isumaqatigiissutaat qanittumi atsiorneqarpoq aalisarneq pillugu isumaqatigiissutip ilassutaa aappaagu atulersussaq pineqarluni.
Qaninnerusumi nunatsinnik suleqateqarnikkut EUp issittoq pillugu suleqatigiinnissamik isumaqatigiissutaa annertusarneqarsinnaavoq assersuutigalugu ilisimatusarnermut, aningaasarsiornerup siuarsarneranut aammalu silaannaap kissakkiartornerata pitsaanerpaamik akiorniarneranut.
Maria Damanakip aamma pulaarniarpaa Pinngortitaleriffik aalisagartassat uumasullu pisassat pillugit siunnersuisartuummata, taamatuttaarlu Inuit issittormiut siunnersuisoqatigiiffiat ICC inuit issittormiut najugaanni silaannaap allanngornerata sunniutai pillugit ataatsimeeqatigineqassalluni.
