Aalisarneq pillugu ataatsimiititaliarsuaq suliaminik inaarsaalersoq
Aalisarneq pillugu Ataatsimiititaliarsuaq aalisarnermut inatsisissamut 2019-imiilli inassuteqaasiornissaminut sulivoq.
Ataatsimiititaliarsuarlu maanna sulinini naggaserlugu isumaliutissiissumik allattoq, Aalisarneq pillugu Ataatsimiititaliarsuaq tusagassiuutinut nalunaarpoq.
- Suli marlussoriarluta ataatsimiinnissarput pilersaarutigaarput, tassani isumaliutissiissummi sammisat kingulliit inaarsassavagut. Allalluguli aallartinnissaanut maanna naammattunik atortussaqalereerpugut. Isumaliutissiissut pilersaarutit naapertorlugit juunip naanerani piariissaaq, Jens Paulsen, Aalisarneq pillugu Ataatsimiititaliarsuarmi siulittaasoq tusagassiuutinut nalunaarummi allappoq.
Corona sulinermut arreequtaasoq
Ataatsimiititaliarsuaq 2019-imi Naalakkersuisuusunit pilersinneqarpoq. Taakkua aalisarnermi sinaakkutinik inatsimmillu nutarsaanissaq inassuteqaasiorfigisussaavaat.
Ataatsimiititaliarsuup sulinera pilersaarutit malillugit siornali piareertussaagaluarpoq. Sulineralli maannamut marloriarluni kinguaattooreerpoq.
AAMMA ATUARUK Aalisarneq pillugu Ataatsimiititaliarsuaq kinguaattooqqittoq
Kinguaattoornernut tamanut coronavirusip ajornartoortitsinera peqqutaavoq. Ataatsimiititaliarsuarmimi ilaasortat pilersaarutitik malillugit imminnut naapissinnaasimanngillat.
- Coronavirusi pissutigalugu kommunit akimorlugit ataatsimiissinnaannginneq kinguaattoornermut peqqutaanerpaavoq, aalisanermut, piniarnermut nunalerinermullu naalakkersuisoqarfimmi pisortaq, Jørgen Isak Olsen marsimi taama oqarpoq.
Aalisarneq pillugu Ataatsimiititaliarsuaq Inatsisartunit 5.1 millionit koruuninik 2019-imiilli aningaasaliiffigineqarpoq.
