Aalisarneq pillugu Ataatsimiititaliarsuaq kinguaattooqqittoq
Aalisarneq pillugu ataatsimiititaliarsuaq suliaminik kinguaattooqqippoq.
Ataatsimiititaliarsuaq februaarip naanerani inassuteqartussaagaluarpoq. Kinguaattooqqareerpoq, maannalu pilersaarutit malillugit ukoq manna qaammatini arfinilinni siullerni inassuteqassaammik naammassinnissaaq.
Aalisarnermut, Piniarnermut Nunalerinermullu Naalakkersuisoqarfiup pisortaa, Jørgen Isak Olsen KNR-imut taama ilisimatitsivoq.
- Coronavirusi pissutigalugu kommunit akimorlugit ataatsimiissinnaannginneq kinguaattoornermut peqqutaanerpaavoq, taanna oqarpoq.
Aalisarneq pillugu Ataatsimiititaliarsuaq Naalakkersuisunit 2019-imi februaarip qaammataani pilersinneqarpoq.
AAMMA ATUARUK Fiskerikommissionens anbefalinger udskudt til februar
Ataatsimiititaliarsuaq aalisarneq pillugu inatsisissamut inassuteqartussaallunilu soorlu pisassiineq, akuersissutit aalisarnermilu nakkutilliineq pillugit iliuusissatut pilersaarusiassamut siunnersuuteqartussaavoq.
Aalisarnermik inuussutissarsiummik ineriartortitsinermut sinaakkutinut tunngasunik imalimmik maannamut nalunaarusiaq, ataatsimiititaliarsuup siorna novembarip qaammataani saqqummiuppaa.
Taamaammat ataatsimiititaliarsuaq 2020-p qiteqqunnerani inaarutaasumik inassuteqassangatinneqarsimagaluarpoq.
Inassuteqarnissaali coronavirusip ajornartoortitsinera peqqutaalluni 2021-mut kinguartittariaqarsimavoq.
Inatsisartut Aalisarneq pillugu Ataatsimiititaliarsuup aningaasaqarnermut inatsimmut inassuteqarnissamik kinguartitsinissaanut akuersillutillu 1 millionit koruuninik aningaasaliipput.
Ataatsimiititaliarsuaq ileqquusumik marsimi ataatsimeersuarlunilu aamma apriilimi ataatsimeersuartussaassaaq, ataatsimiititaliarsuarmilu ilaasortat ulluni tallimani inaarutaasumik inassutiliussasut, naalakkersuisoqarfiup pisortaa oqarpoq.
