Sulisitsisut: Aalisariutit amerlavallaalersinnaapput

Taamaammat Sulisitsisut aalisariutinik amerliliisigani isumatusaarnissaq silatusaartuunissarlu kajumissaarutigaat, taamaaliunngikkuttami aalisarnermi aningaasaqarneq ajornerulissaaq taamaalillunilu suliffissat pisortallu isertitaat annaaneqarsinnaapput.

Nunatsinni inuussutissarsiutini pingaarnerpaaq suliffissaqartitsivoq. Qaleralinniarneq, saarullinniarneq suluppaagarniarnerlu naatsorsuutigisamit ajunnginneruvoq, niuernermilu akit ajunngissimaqaat. Aammali mianersorfissaavoq.

- Ukioq manna ajornartorsiutigisarput ajunngitsuuvoq; tassa aalisariutit qaleralinnik, saarullinnik,suluppaakkanik allanillu aalisarnerminni pisassiissutit qaammatini qulingiluani tamakkerpaat. Imaappoq aalisarnerput siornatigornit sukkaneroqaaq, tamannalu aalisartoqarpallaarnitsinnik takussutissiivoq, Sulistsisuni siulittasioq, Henrik Leth oqarpoq. 

Erseqqissarlugulu maannakkorpiaq ajornartorsiuteqanngitsoq. Takkussinaappulli.

- Tassami maannakkut suli ajornartorsiuteqalinngilagut, umiarsuilli amerlatsikkaluarpata ajornartorsiuteqalissaagut, Henrik Leth oqarpoq. 

Kilisaatit tallimat ukioq manna pisassaarukkamik qaammatini kingullerni talittarfimmiiginnarput, tamannalu aningaasarsinikinnerussutaavoq.

- Tassalu aningaasaliiffigisarujussuagut suliaqaratik uningaannarput, taamaanneralu umiarsuuateqarfinnut naleqarpoq nunattalu iluanaaruteqarfissaraluanut annaasaqaataalluni, Henrik Leth oqarpoq.  

Imartarujussuatsinnili aalisakkanik allanik pisassaqanngikkaluartoq pisassiissutit qaffanneqassanngitsut, siulittaasoqisumaqarpoq.

- Oqarsinnaanngilagummi pisassiissutit pingasoriaatinngortinneqassasut, taamatulluunnit assingusumik, taamaaliornissarmi peqassutsikkut toqqammavisaqarnavianngilaq: assigiinngitsullu misissugasaqqipput. Assersuutigalugu ingammik Tunumi avataasiorluni alisarnermi pisassiissutit ilisimatuussutsikkut  tunngavilersorluagaanngitsut isumaqarpugut. Tamatumani immaqa iliuuseqartoqarsinnaagaluarpoq, aammami iliuuseqartoqareerpoq. Pinngortitalerifimmut aningaasaliissutit amerlineqarput, Henrik Leth oqarpoq nangillunilu.

- Imaanngilaq sunik tamanik ullumikkornit allaannerusunngortitserusutugut. Isumaqartugununa, atorsinnaasumik aaqqissuussisimagaanni taava aalisariutit ilaartornerisigut uagutsinnut ajornartorsiusersortariaqanngilagut, Henrik Leth KNR-imut oqarpoq.