Aalisartut kissaateqarmata: Tulaassisussaatitaanermik piumasaqaateqarfiusut affaannanngortinneqartut

Aaqqiineq: Ilanngutassiami allanngortinneqannginnerani 'tulaassisussaatitaanermik piumasaqaateqarfiusut' kukkusumik paasineqarsimavoq. Ilanngutassiap allanngortinneqannginnerani qaleralittassat affaannanngortinneqarneratut allassimavoq, taamaattoqanngilarli. Ilanngutassiap quleqataa qulequtaatalu ataaniittoq maanna aaqqinneqarpoq.

Coronap ajornartorsiortitsinera qaleralinnik tunisassiornermut eqquingaatsiarpoq.

Akit appariartornerat pisisartukinnerulerneralu nunatsinni aalisarnermik inuussutissarsiortunut unammillernartoqartitsingaatsiarput, pisaminnik tunisiniarnermik ajornartorsiormata. Tamanna pissutigalugu suliffeqarfiit politikerinit ikioqqupput.

Taamaammat Naalakkersuisut ’nunatta kitaani qalerallit tulaassisussaatitaanermik piumasaqaateqarfiusut” 5.502 tonsimit 2.751-imut apparlugit nalunaarutigaat.

AAMMA ATUARUK KNAPK: Aalisartut coronap ajornartorsiortitsinerata nalaani aningaasatigut ikiorneqartariaqarput

Taamaaliornikkut suliffeqarfiit toqqorsivii qaleralinnik tunineqarsinnaanngitsunik ulikkaarnaveersaarneqassapput. Taamaaliornikkullu aalisakkat akikitsumik tunineqarnissaat pinaveersaarneqarsinnaalluni. Tamanna nunatsinni akileraarutitigut isertitassanik annaasaqannginnissamut qulakkeerutaassaaq.

Royal Greenlandip pisortaanera, Mikael Thinghuus, aperigaanni tulaassisussaatitaanermik inatsit sumiiffinni illoqarfinni minnerusuni nunaqarfinnilu tunisassiornermut suliffissaqartitsinermullu qulakkeerutaalluni pingaaruteqarpoq.

Politikerilli maanna iliuuseqarnerat paasisinnaavaa.

- Utaqqiisaarutaasumik iliuuseqarneq isumatusaarnerorpaluppoq. Europap kitaani neriniartarfinnut kantiinanullu, tassa pisisartunut pingaarnerusunut, qaleralinnik tunisisarneq ajornartooqqavoq.

- Iliuuseq suliffeqarfinnut ikiuutaassaaq, piffissamut imaannaanngitsumiilissannngimmata inuiaqatigiillu akileraarutitigut akitsuutitigut annaasaqassanatik, Mikael Thinghuus KNR-imut oqarpoq.

AAMMA ATUARUK Coronap ajornartorsiortitsinera aalisakkat akiinut pingaarutilinnut appartitsisinnaasoq

Tusagassiuutinut nalunaarut naapertorlugu Naalakkersuisut qaleralittassanik tulaassisussaatitaanerup ineriartornera malinnaaffigalugu qaammatit pingasukkaarlugit nalilersuiffigisarniarpaat.