Aalisagartassiissutissat amerlasuut IA-mit D-miillu ernumanartoqartinneqartut
- Naalakkersuisut ilumut taamaaliussappata navianartortaqartoq isumaqarpugut. Tassa immeraanneruvoq. Siunissarput bingossutigineqassaaq, Demokraatit aalisarnermut piniarnermullu oqaaseqartartuat, Michael Rosing oqarpoq.
Ukioq manna saarullittassiissutit biologit innersuussutaanniit pingasoriaatingajammik amerlanerupput.
Aalisarnermullu naalakkersuisup AG-mit apersorneqarnera tunngavigalugu aappaagumut aalisagartassiissutit ikilinerujussuarnissaat ilimananngilaq, naalakkersuisullu aalisakkat ikilivallaarnissaat ernumaginagu oqaatigaa.
AAMMA ATUARUK Pisassiissutit amerlavallaarpata aalisarneq innarlerneqarsinnaavoq
Demokraatiniilli tamanna isumaqatigineqanngilaq.
- Ukiuni arlaqartuni aalisarujussuartoqariarluni aalisarneq ajalusooratarsinnaavoq, ukiunilu tulliuttuni 20-ni aalisarneq unittoorluni. Inuusuttut aalisarusuttut eqqarsaatigalugit ajorluinnassasoq isumaqarpugut. Ukiummi arlaqanngitsut qaangiuppata aalisagaqarnissaa nalorninarmat, tamannalu inuusuttunut aalisarusuttunut sunniuteqarnerloratarsinnaavoq, Michael Rosing oqarpoq.
AAMMA ATUARUK Biologit siunnersuinerisa akerlianik pisassiissuteqarnissamut Enoksen piareersimasoq
Aalisagartassiissutillu biologit innersuussutaanniit amerlanerujussuugaangata nunanit allanit malugineqartartoq Inuit Ataqatigiit sinnerlugit aalisarnermut ataatsimiitsitaliami ilaasortap, Ane Hansenip, oqaatigaa.
- Uagut Nunatsinni aamma taamatut ingerlalluta arlorniarutsigit nunat niuerfitta akornannit isiginiarneqalinngitsoornavianngilagut, Ane Hansen oqarpoq.
Isigineqarnerlunnerlu aalisakkanik avammut tunisinermut ajoqutaasinnaasoq Ane Hansen isumaqarpoq.
- Nunarsuarmi niuerfinni meqqi MSC-mik taaneqartartoq, tassa piujuaannartitsineq tunngavigalugu aalisarneqarsimaneranik uppernarsaat, pingaartinneqariartorpoq. Taamaattoqanngippat piserusunneq annikinnerujussuusarluni, taavalu akinut aamma attuumassuteqartorujussuulluni, Ane Hansen oqarpoq.
AAMMA ATUARUK Aalisartut piniartullu sunniuteqarnerussapput