Aalborgip Umiarsualivia containerinut inissiisarfimmik nutaamik sanaartorniartoq
Inissiisarfittaassaq containerilersornermi atortulersuutinik nutaalianik tamanik pigisaqassaaq umiarsualiviullu maanna inissiisarfiata kangiatungaani sanaartorneqassalluni.
Pissutsit ullumikkutut itsillugit Aalborgimi umiarsualivik, naatsorsuinerit malillugit, containerilersornermut annertusiartuinnartumut tunngatillugu ukioq 2022-mi mikivallaalersimassaaq. Taamaammat umiarsualivimmi TEU-t 200-000-it ukiumut naammassineqarsinnaasunngorlugit Aalborg Havn A/S allileriniarpoq. (TEU-p ataatsip assigaa containeri 20 foditut angitigisoq).
- Naatsorsuinerit Aalborgimi inuussutissarsiornermi, tunisassiornikkut atuinikkullu, siuariartuinnartoqarnissaanik Aalborgillu umiarsualiviata nunap immikkoortuanut tamarmut qitiuleriartuinnarnissaanik ilaatigut tunngaveqarput, Aalborg Havn A/S-imi siulersuisut siulittaasuat Thomas Kastrup-Larsen taama oqarpoq.
AAMMA ATUARUK Aalborg Havn vil tilpasse sig RALs behov
Amerlanerusunik sullitaqarusuttut
Royal Arctic Linep maanna isumaqatigiissutaasoq 2022-mi atorunnaarpat Aalborgip umiarsualivianik atuiunnaarnialersaarnerata malitsigisaanik taama nalunaaruteqartoqarpoq.
Aalborgillu umiarsualiviata nalunaarutaa naapertorlugu, siunissami ataasiinnarmik sullissoqaranilu sammisat ataasiakkaaginnaassanngillat. Sullinneqartoq ataaseq ingerlatseqatigiiffiup kaaviaartitaata 15 procentiata angeqqataannaanik iluanaaruteqarfiusassaaq.
- Sullitat angisuut ataasiakkaat toqqammavigalugit ingerlatsiniarneq nalorninartoqartupilussuuvoq, taamaammat nutaanik sullitaqalernissatsinnik sulissuteqarnerput pitsaasoq ingerlatiinnassavarput. Aamma aaqqissuussinerit unammillersinnaassusillit amerlanerusut siunissami atulissavagut, taamaaliornikkut Jyllandip avannaani nioqqutissanik eqqussuisut avammullu nioqquteqartut nunap immikkoortuani umiarsualivimmik nutaaliaasumik qanitaminnik iluaqutissartalimmillu atuilersinniarneqassallutik, Aalborgip umiarsualiviani pisortaq, Claus Holstein, taama oqarpoq.
Inissiisarfittaassaq qaqugu sanaartoqassanersoq suli aalajangiiffigineqanngilaq.