Aalborgimi oqaatsivut atorlugit atornerluinermut katsorsaasalerniartut

Kommunimi innuttaasut kalaallit imigassamik aanngaajaarniutinillu allanik atornerluinermut danskit oqaasii atorlugit katsorsaanermut peqataanissaminnik ajornakusoortitsisimasut pitsaanerusumik ikiorserniarlugit kommuni taama iliornialerpoq.

Aalborgip Kommuniata Inersimasunut Sullissiviani pisortaq, Johnny Friis, taama oqarpoq.

- Innuttaasut Kalaallit Nunaanneersut maanga nuuttut danskisut oqalussinnaagaluarlutik ilaatigut paatsooqatigiittoqarsinnaanera nalaattarsimavarput. Isumaqarpungalu innuttaasut kalaallit kulturiannik aammalu suminngaanneernerannik ilisimasaqarneq nukittorsaataassasoq aammalu oqaatsitsigut tamakkiisumik attaveqaqatigiissinnaaneq iluaqutaassasoq, KNR-imut taama oqarpoq.

Aamma atuaruk Tikilluaqqusinissamut neqeroorut Aalborg Kommunep taamaatiinnarpaa

Ukiuni tullerni marlunni misiliutitut ingerlassaaq

Nuummi Katsorsaavimmeersut Aalborgimi kalaallinik atornerluinermut katsorsaanermut ingerlatsisuussasut Aalborgip Kommunianit ilisimatitsissutigineqarpoq. Katsorsaaneq katsorsaavimmut unitsitaanani ingerlanneqassaaq innuttaasullu 20-kkuutaarlugit katsorsarneqartassapput.

Oqaatsivut atorlugit katsorsaaneq tapersersuinermik aaqqissuussinerup annertuup ilagissavaa, sinneralu danskit oqaasii atorlugit ingerlanneqassalluni.

Aamma atuaruk IKIORTARIALLIT Peqatigiiffik Aalborgimi kulturimik nutserisortaarusuttoq

Katsorsaaneq ukiuni tullerni marlunni misiliutitut ingerlanneqassaaq.

Aalborgip Kommunia 2016-imi tamatumunnga 200.000 koruuninik immikkoortitsisimavoq, Inersimasunulli Sullissiviup pisortaata Johnny Friisip KNR-imut oqaatigaa taamatut neqerooruteqarnerup siunissami ataavartunngortinneqarnissaa naatsorsuutigalugu.