Aalborgimi isumaginninnermik suliaqartut kalaallit kulturiannik ilinniartinneqassasut

Aalborg ukiuni qulikkaani arlaqartuni kalaalerpassuarnit nuuffigineqartarpoq. Illoqarfiup kangiata tungaa ”Grønlandskvarteret”-mik taaguuteqartinneqarpoq aqquserngit Kalaallit Nunaanni sumiiffiit inuillu aqqi atsiunneqarsimallutik.

Kommunimili Kalaallit Nunaannik ilisimanninneq imaanngilaq annertummat. Taama Aalborg Kommunemi ilaqutariinnut sullissivimmi Familiecenter Østimi pisortaq Marianne Mortensen KNR-imut oqarpoq. 

- Immikkoortortatsinni kalaallinit kingoqqisorpassuarnik innuttaasoqarpugut. Nassuerutigisariaqarsimavarpullu innuttaasutsinnik kalaallinik sullissinerput naammattumik pikkoriffiginnginnatsigu.

Ilaqutariinnik sullissivimmi sulisut meeqqanut, inuusuttunut ilaqutariinnullu atugarliortunut siunnersuinermiit ikorfartuinermiillu meeqqanik angerlarsimaffiup avataanut inissiinernut suliaqarput.

Danmarkip sinneranisulli Aalborg Kommunemi meeqqat ilaqutariinnit kalaallinit angerlarsimaffiup avataanut inissinneqarsimasut meeqqanit ilaqutariinnit qallunaaneersunit amerlanerupput.

Ilaqutariinnut sullissiviup assersuutigalugu atuarfimmit, ulluunerani paaqqinnittarfimmit politiiniilluunniit nalunaaruteqarnerit nalinginnaasumik qisuariarfigisarpai.

Kommunemi ilaqutariit kalaallit ukiorpassuarni sullinneqarstarsimagaluarlutik isumaginninnermik suliaqartut ilaqutariillu akornanni tatigeqatigiinneq ilaatigut qajannarpoq.

- Innuttaasut kalaallit ilaat misigisimapput ilaqutariinnut sullissivimmukarunik meeraat angerlarsimaffiup avataanut inississagigut. Iliuusererusunngisarpulli tassaavoq meeqqat kikkulluunniit angerlarsimaffiup avataanut inissinnissaat, Marianne Mortensen oqarpoq.

Ajornartorsiutilli ilaanni annertuallaalertarput ilaqutariit piffissaagallartillugu ikiorneqarneq ajoramik.

- Kingusippallaamik immitsinnut angusarpugut, Marianne Mortensen, oqarpoq.

Paarlaanneq, saqqummiineq sammisaqarlunilu ulloqarneq

Ilaqutariinnut sullissivimmit taamaammat aalajangiunneqarpoq sulisut kalaallit kulturiannik ilisimasaqarnerulissasut ilaqutariinnik kalaallinik atugarliortunik suleqateqarnerup pitsaanerulernissaa neriuutigalugu.

Ilisimatusarfiup VIVE-p nalunaarusiaani siorna saqqummersumi innersuussutinut tamanna aamma ilaavoq. Tamatumani inerniliussat ilagaat sulianik suliaqartut qallunaat akornanni kalaallit kulturiannik ilisimasaqarneq ajorpallaartoq illuatungaanilu innuttaasut kalaallit akornanni Danmarkimi oqartussanut pigiliutiinnakkanik isumaqartoqartoq.

Maannamut Aalborgimi ilaqutariinnut sullissivik VIVE-p nalunaarusiaanut ilisimatusartut ilaannik pulaartoqarsimavoq, kulturi ileqqullu pillugit Peqatigiiffik Kalaallit Meerartaannit saqqummiisoqarsimalluni, kiisalu kalaallit meerartaannut illersuisoqarnermik aaqqissuussap pisortaa misilittakkaminik oqaluttuartinneqarsimalluni.

Kalaallit Nunaat pillugu ukiut tamaasa pisartussamik sammisaqarluni ulloqartitsisarnissaq kommunimit aamma aallartinneqarsimavoq. 

Aalborgip Nuullu akornanni inunnik isumaginninnermik suliaqartunik ukiorpassuarni aamma paarlaaqatigiittoqartarsimavoq illoqarfiit taakku illoqarfittut ikinngutigiimmata. 

Oqalutseqarneruneq atulersinneqarpoq

VIVE-mit nalunaarusiap aamma tikkuarpaa inissiinermik suliarpassuarni oqaatsitigut assigiinngissuteqarneq ajornartorsiutaasorujussuusoq. Ilaqutariinnullu sullissivimmi pisortap Marianne Mortensenip tamanna nassuerutigaa.

Ilaqutariinnut sullissivik taamaammat aalajangersimavoq ilaqutariinnik kalaallinik pisuni amerlanerusuni oqalutsit atorneqartassasut. Aamma kalaalerpassuit qallunaatut oqallorikkaluarpata.

- Ataatsimiinneq innuttaasumit qimanneqaraangat misigisarsimavugut alloriaqqinnissaq isumaqatigiissutigisimallutigu. Kingornali paasisarparput taamaattoqanngitsoq. Attaveqaqatigiinnermi paatsooqatigiittoqarsimasoq, Marianne Mortensen oqarpoq.

Taamaattoqarsinnaanngilarlu, pingaartumik meeqqamik angerlarsimaffiup avataanut inissiinermut tunngatillugu.

- Pingaarutilinnik ilungersunartunillu suleqatigiissuteqassatilluta ataatsimiinnermi oqaluuserisatta paasineqarsimanersut paasissallugu pingaarteqaarput, Marianne Mortensen oqarpoq.

VIVE-p nalunaarusiaata aamma tikkuarpaa, angajoqqaat piginnaasaasa misissorneqarnerat kalaallit kulturiannut oqaasiannullu naleqqussarneqarsimanngitsut atorlugit ingerlanneqartartoq. Aalborgimilu Familiecenter Øst-imi ajornartorsiut ilisimaneqarluarpoq.

Kommunilli ataasiakkaat namminneerlutik misissuinermi apeqqutinik allannguisinnaanngillat apeqqutinilluunniit minitaqarlutik, Marianne Mortensen nassuiaavoq. Eqqartuussinermi kommunimut inatsisitigut tamanna atorneqarsinnaavoq.

Angajoqqaat piginnaasaannik misissuinerit allanngortinneqassappata taamaammat nuna tamakkerlugu allanngortinneqartariaqarpoq.  

Sunniutaa uuttortarneqarsinnaanngilaq - suli

Kalaallit kulturiannik ilinniartitsineq ima iluaqutaatigisimava uuttortarneqarsinnaalluni?

- Aappimik akerusukkaluarpunga. Taamaaliuissinnaanngilangali. Inissiinerit amerlassusaatigut maannamut takusinnaannginnatsigu. Isumaqarpungali eqqortumik alloriarsimalluta, Marianne Mortensen oqarpoq.

Itisiliivoq:

- Kalaallinik ilaqutariinnik suleqateqarnermut qanoq iliortariaqarnertik pillugu siunnersuisut eqqumanerujussuanngorsimasut misigisimavara.

Ilaqutariinnut sullissivimmi pisortaq naalagaasuuguni kalaaleq Danmarkimut nuukkaangat qallunaarlu Kalaallit Nunaannut nuukkaangat tikilluaqqussuteqarnissaa pitsaanerpaassagaluarpoq.

Paatsoornerit isummallu pigiliutiinnakkat arlallit pinngitsoortinneqarsinnaassasut isumaqarpoq.

- Innuttaasup nuna nuuffigalugu tikitaa qanoq ittuuneranik ilisarititsiffigineqarnissaanik arlaatigut iliuuseqassasugut. Aaqqissuussaaneq qanoq ittoq najugaqarfigineqarpa qanorlu Danmarkimi Kalaallit Nunaanniluunniit inuiaqatigiinni ilaanissamut iliortoqassava, Marianne Mortensen oqarpoq.