Aajuna juullip nipitittagaa

Ukiormanna juullip nipitittagaa Malînánguaq M. Mølgaardip titartarpaa. Assiliartaliunneqarput meeqqat tasiortut nunaminnik kivitseqatigiinniarlutik piareersimasut.
Allattoq Noah Mølgaard
oktobarip 31-at 2012 07:44

Katuaq inersuaaraani ippassaq marlunngornermi juullerpalaartoqarpoq ukiormanna juullip nipitittagaa saqqummiunneqarmat. Tassannga titartaasuuvoq eqqumiitsuliortoq Malînánguaq M. Mølgaard, juullillu nipitittagaa qulequtsersimavaa: ”Juullip unnuaani ”issittup qitornai".

Titartarneqarsimasut tassaappuot meeqqat tasiortut. Kalaallisut assuutitik atorlugit qummut isigisaat tassaapput neriusaat juullillu ulloriaa aamma ullup malittaanik taaneqartartoq.

Titartagaq taanna juullimut nassiussarpassuarni takussaajumaartoq eqqarsaatersuutinik tunuliaqutalimmik aamma titartagaavoq.

- Nunaminni sumiiffinni aallaavitik ataqqivaat, taamaammallu assuutitik kinaanerminnik ilisarnaatigisatik atorpaat. Angutit arnallu suleqatigiilluarlutik pilersitaat. Piniartorsuit issi perluk uniffiginagit puisit, nannut tikiussaat – assaallu uniffeqaratik kusanartuliorusussusillit ulu, ujaloq, meqqutinnguillu atorlugit pilersissimassaat. Nunaga inuilu asavakka, inuusuttullu neriuuteqarluarfigalugit tulluusimaarutigalugillu, Malînánguaq M. Mølgaard titartakkamini eqqarsaatersuutini pillugit allappoq.

KNRip erinarsoqatigiivi Qupannavaat juullisiutinik Katuami erinarsorput tusarnaartut kaffisorusaajutaa kaagiaqqanik juullisunnitsunik oqummerartut. Juullip nipitittagaata nersornaataa aamma tunniunneqarpoq. Tassannga akissarsitinneqarpoq pattallaqqissorsuaq Jim Milne ukiut qulikkaat arlallit ingerlaneranni immiussani assigiinngitsuni peqataasartoq. Taanna checkimik 25.000 koruuninik aningaasartalimmik tunineqarpoq.