Aajuku Demokraatit qinigassanngortitaat
![](/sites/default/files/styles/image_934x467/public/article_images/demokraternes_kandidater_630_1.jpg?itok=j6r5rBAR)
Demokraatit Folketingimut qinigassanngortippaat Niels Thomsen, Michael Rosing, Ane Lone Bagger aamma Aviaaja Karlshøj Poulsen. Taakku marlunngornermi ualilluinnaraa ilisaritinneqarput.
Demokraatit partiit allat pisarnerattut Folketingimi suleqatigiit arlaannut pituttoreernianngillat. Taamaasilutik kina Statsministerissatut piukkunnerlugu tikkuareernianngilaat.
- Taamaasiornikkut qulakkeerniarparput Kalaallit Nunaata pissarsiassaa pitsaanerpaaq, Niels Thomsen qinigassanngortittut saqqummiunneqarneranni oqarpoq.
Aviaaja Karlshøj Poulsen politikkimi nunatsinni nutaraavoq taamaattorli Danmarkimi ilinniartut akornanni peqatigiiffilereqataasarsimalluni. Ane Lone Bagger Qaasuitsup Kommuniani kommunalbestyrelsemut ilaasortaavoq, Niels Thomsenilu Inatsisartuni ilaasortaavoq. Michael Rosing Inatsisartunut qineqqusaareernikuuvoq aammalu qinigaaffiup ingerlanerani sinniisutut Inatsisartuni suleqataallatsiarsimalluni.