PITUFFIK Aaja: Pituffik pillugu allagaatit saqqummiunneqartariaqarput
Nunanut allanut tunngasunut ministerip Kristian Jensenip Pituffimmi kiffartuussinissamik isumaqatigiissutip suliariumannittussarsiuunneqarnera pillugu Nunatta, USA-p Danmarkillu akornanni attaveqaqatigiinnermik saqqummiussaqarumannginnera Folketingimut ilaasortap Inuit Ataqatigiinneersup Aaja Chemnitz Larsenip isornartorsiorpaa.
Taanna isumaqarpoq Folketingip nunanut allanut tunngasuni aalajangiisartuisa aammalu Kalaallit Nunaannut tunngasunut ataatsimiititaliaata qanoq attaveqaqatigiittoqarsimaneranik paasitinneqartariaqartut.
- Isumaqarpunga Folketingimi ataatsimiititaliat susassaqartut suliami qanoq pisoqarsimaneranik paasisaqartikkumallugit allagaatinik takusaqarnissaminnut periarfissaqarnissaat pingaaruteqartoq, Aaja Chemnitz Larsen KNR-imut taama oqarpoq.
AAMMA ATUARUK Isornartorsiut: Pituffimmut tunngasut saqqumminneqarlik
AAMMA ATUARUK Danskit nunanut allanut tunngasunut ministeriat siumut isigaluni suliniartoq
Illersornissamik isumaqatigiissutip isumaqatigiinniutigeqqinnissanut pingaaruteqartoq
Danskit nunanut allanut tunngasunut ministerertaavata Kristian Jensenip Nunatsinnut tikeraarnerminut atatillugu oqaatigaa, nunat taakku pingasut akornanni attaveqaqatigiinneq Nunanut allanut tunngasunut ministereqarfiup saqqummiutissanngikkaa, isumaqatigiissutaasup amerikami eqqartuussivimmit atuuttussaajunnaartinneqarnera tunngavilersuutigalugu.
Partiilli Venstrep qinersineq sioqqullugu piumasaqaatigaa Nunanut allanut tunngasunut ministereqarfik allagaatinik saqqummiussaqassasoq.
Taamatullu piumasaqaateqartoqarsimanera Inuit Ataqatigiinnit Kristian Jensenimut eqqaamaqquneqarpoq, minnerunngitsumik illersornissamik isumaqatigiissutip USA-mut siunissami isumaqatigiinniutigineqaqqinnissaa eqqarsaatigalugu.
- Illersornissamik isumaqatigiissut maanna atuuttoq naammaginarnersoq aamma paaserusunnarpoq. Kiffartuussinissamik isumaqatigiissut amerikamiut suliffeqarfiutaannut tunniunneqarsinnaappat, taava illersornissamik isumaqatigiissut kalaallit soqutigisaasa isumaginiarnissaannut tunngatillugu naammaginarpa?
Folketingimut ilaasortap Siumumeersup Aleqa Hammondip KNR-imut oqaatigaa Kristian Jensenip taamatut nalunaaruteqarnera "tusaatissatut tigullugu" pineqartorlu annerusumik oqaaseqarfigiumanngilaa.
