Pituffik pillugu ammasumik ingerlatsisoqarnissaanik Venstre piumasaqartoq
Pituffimmi sakkutooqarfik pillugu suliaq Danmarkimi qineqqusaarnermut akuliutsinneqarpoq. Venstre Folketingimut qinersinermi ajugaassaguni danskit nunanut allanut tunngasunut ministereqarfianni allagaatit Pituffimmi sakkutooqarfimmi kiffartuussinissamik suliariumannittussarsiuussinermut tunngasut tamaasa avammut saqqummiunniarpai.
Partiip Kalaallit Nunaannut tunngasunut oqaaseqartartua, Troels Lund Poulsen, KNR-imut taama oqarpoq.
- Qinersinermi ajugaassagutta soorunami suliaq sukumiisumik misissortariaqassavarput. Suliarmi ilungersunarluinnartutut isigaarput iterngalu tikillugu misissorusupparput. Isumaqarpugummi isumaqatigiissutaasimasut naalagaaffeqatigiinnut tunngatillugu danskit tungaannit naammaginartumik nakkutigineqarsimanngitsut.
AAMMA ATUARUK Pituffik pillugu isumasiuineq - piffissaq kingullerpaaq atorlugu
Allagaatit ministerikkoortut saqqummiunneqanngillat
Ministeriunerup Helle Thorning-Schmidtip nunanullu allanut tunngasunut ministerip Martin Lidegaardip peqataaffigisaannik Folketingip Kalaallit Nunaannut tunngasunut ataatsimiititaliaani ammasumik siunersiueqatigiinnermi taama oqarpoq. Pituffimmilu kiffartuussinissamik isumaqatigiissut kingumut oqallisaavoq.
Lidegaardip ataatsimiinnermi ilisimatitsissutigaa Pituffimmi kiffartuussinissamik isumaqatigiissut pillugu Nunanut allanut tunngasunut ministereqarfiup Namminersorlutillu Oqartussat akornanni attaveqaqatigiissimaneq tamarmi saqqummiunneqassasoq, tamannalu siornatigut aamma oqaatigereernikuuaa. Tamannalu pissaaq Pituffimmi sakkutooqarfimmi kiffartuussinissamik isumaqatigiissutip suliariumannittussarsiuunneqarnera sioqqullugu, suliarineqarnerani aammalu kingorna Namminersorlutik Oqartussat peqataatinneqarsimanerat takutinniarlugu.
AAMMA ATUARUK Helle Thorning-Schmidt Martin Lidegaardilu isumasioqatiginiarlugit aggersarneqartut
Allagaatilli ministerinut saqqummiunneqarsimasut tamatumani ilanngunneqassanngillat, tassalu allagaatit nunanut allanut tunngasunut ministeriusartut Nunanut allanut ministereqarfimmi atorfilittanit saqqummiunneqarsimasut. Tamannami Folketingimi ileqqorineqanngilaq, nunanut allanut tunngasunut ministeri oqarpoq.
- Una peqqutaavoq, Danmarkip Kalaallit Nunaatalu attaveqaqatigiittarsimanerannut tunngassuteqanngimmata. Kalaallit Nunaanni misissuisoqannguatsiarpoq Nalaakkersuisut iluanni susoqarsimanersoq. Tamanna akuleruffigissanngilara, misissukkattali aamma ilagaat. Taamaalioraluarutta suliani assingusuni Folketingip naalakkersuisullu akornanni ileqquliunneqarsinnaammat tulluanngitsoq. Tamannami aamma apeqqutigineqanngimmat. Apeqqutigineqartoq tassaavoq suliaq pillugu Danmark Kalaallit Nunaallu qanoq qanitsigisumik suleqatigiissimanersut. Allagaatillu uppernarsaatissat tamanna takutikkumaarpaat, Martin Lidegaard KNR-imut taama oqarpoq.
Poulsen: Suut tamaasa saqqummiunneqassapput
Taamatulli tunngavilersuuteqarnera Troels Lund Poulsenip isumaqatiginngilaa.
Kiffartuussinissamik isumaqatigiissutip suliariumannittussarsiuunneqarneranik kikkut ilisimasaqarsimanersut Kalaallit Nunaannit Danmarkimiillu tamakkiisumik paasineqassappat, taava ministerinut saqqummiunneqarsimasut qaqilerneqartariaqarput, Lund Poulsen oqarpoq.
- Attaveqaqatigiinnerup qanoq ingerlanneqarsimanera takutinniarneqassappat, taava soorunami Nunanut allanut tunngasunut ministereqarfiup aammalu Statsminieqarfiup akornanni aammalu Namminersorlutik Oqartussanut attaveqaqatigiinneq takusariaqarpagut. Aamma suliamut tunngatillugu ministeriusartunut saqqummiunneqarsimasut misissortariaqarpagut, aamma danskit tungaannit, Troels Lund Poulsen KNR-imut taama oqarpoq.
