Pituffik pillugu isumasiuineq - piffissaq kingullerpaaq atorlugu

Pituffimmik sullissinissamut isumaqatigiissutip Greenland Contractorsimit annaaneqaqqammersup matumani eqqartorneqarnissaa ilimagineqarpoq.
 
Partii Venstre Helle Thorning-Schmidtimik aggersaasuuvoq. Ministeriunerup suliamut atatillugu aggersarneqartarnikuugaluarluni isumasioqatigiinnernut peqataasarsimannginnera, Folketingip siulittaasuata siusinnerusukkut isornartorsiornikuuaa.
 
Helle Thorning-Schmidtilli ministeriunerunerata nalaani taama kingullerpaamik ataatsimiittoqassagunarpoq, ataatsimiittoqassappammi. Ataatsimiinnissarmi imaassinnaasoq taamaatiinnarneqartoq. Danmarkimimi Folketingimut qinersisoqarnissaanut ministeriunerup nalunaaruteqarnissaanut tusatsiakkat imaaginnavipput. Helle Thorning-Schmidtimmi Folketingimut qinersisoqarnissaanut sapaatip-akunnerata massuma ingerlanerani nalunaaruteqarnissaa, Danmarkimi tusagassiuutit immikkullu ilisimasallit ilimagaat.

AAMMA ATUARUK Helle Thorning-Schmidt Martin Lidegaardilu isumasioqatiginiarlugit aggersarneqartut

Nunattalu nalunaaqutaa naapertorlugu tamanna ullumi ullaap tungaani qulinut qiteqqunnerata missaani pisinnaavoq, Folketingillu Kalaallit Nunaannut tunngasunut ataatsimiititaliaata Pituffimmik sullissinissamik isumaqatigiissummut annaaneqartumut apeqquteqaataasa akissuteqarfigineqarnissaat ataatsimiititaliap utaqqisariaqassavai.
 
Folketingimut qinersisoqarnissaanut sapaatip-akunnerata massuma ingerlanerani nalunaaruteqartoqassappat, taava juunimi qinersisoqassasoq, immikkut ilisimasallit oqaatigaat.
 
Folketingimut kingusinnerpaamik ukioq manna septembarip ulluisa 14-ianni qinersisoqartussaavoq.