Aaja Chemnitz Larsenip nunaqarfiit matuneqarnissaat IA-mi suli oqaluuserineqanngitsoq siunnersuutigigaa
Folketingimi ilaasortat tamarmik tunngaviusumik inatsit naapertorlugu qanorsuaq isummersinnaatitaapput.
Inuit Ataqatigiinneersullu Aaja Chemnitz Larsenip qanorsuaq isummersinnaatitaanini Folketingimi sapaatit akunnerata siuliani ammaanersiornermi oqalugiarnermini atorpaa. Oqalugiarami oqarpoq ima:
- Nunatsinni najugaqarfiit 80-ingajaasut ikinnerusariaqarsoraakka. Illoqarfiit ineriartortinneqassapput, nunaqarfiit ingerlalluartut matuneqassanngillat nunaqarfiillu sinnerisa inuerukkiartorneri ilutigalugit matujartuaarsallutik.
"Inuit Ataqatigiit najugaqarfinnik matusinissaq politikkikkut anguniagarinngilaat". Inuit Ataqatigiit siulittaasuat, Múte B. Egede, Aaja Chemnitz Larsenip oqalugiarnerata aqaguani taama erseqqissaavoq.
Aaja Chemnitz Larsenilu IA tamarmi sinnerlugu namminerluunniit isummani tunngavigalugu oqalugiarnersoq, Siumumit Folketingimi ilaasortap Aki-Matilda Høegh-Damip Aaja Chemnitz Larsen oqalugiariitsiartoq apeqquserpaa.
Aaja Chemnitz Larsen: Qinikkat killiliiffigineqaratik annertusisamik oqaaseqarsinnaatitaapput
Oqalugiarnerminilu oqaasissani Inuit Ataqatigiit siulersuisuinut saqqummiuteqqaarsimanngikkini, Aaja Chemnitz Larsenip KNR-imut nassuerutigaa.
- Siulersuisuni ilaasortanit tamanit isummerfigineqarluni tunngaviusumik oqallisigineqartariaqarsorigakku siulersuisunut oqalugiariitsiarninni oqallisigisassanngortippara. Oqalugiannginninni oqalugiareerninniluunniit oqallisigisassanngortissimagukku pitsaanerusimassanersoq oqallisigineqartuaannarsinnaavoq.
§57-imi allaqqasoqarpoq ima: "Ilaasortaq kinaluunniit inatsisartuni oqaaserisimasani pillugit inatsisartut akuerseqqaarsimatinnagit inatsisartunit qimagusimanermini pisuutinniarneqarsinnaanngilaq".
Tassa imaappoq, Folketingimi ilaasortat Folketingimi oqalugiarnerminni tunngaviusumik inatsit naapertorlugu killiliiffigineqaratik annertusisamik oqaaseqarsinnaatitaapput. Folketingimi ilaasortat Folketingimi oqaaserisimasatik pillugit assersuutigalugu eqqartuussivimmut suliassanngortinneqarsinnaanngillat, Folketingi taamaaliortoqarnissaanut akuersisimanngippat. Taamaaliornikuunngisaannarlunili.
Tusarfik: Folketinget.dk
Qinikkatulli killiliiffigineqarani annertusisamik oqaaseqarsinnaatitaalluni erseqqissarpaa.
IA-mit politikerip tamanna nunatsinni oqallisigineqanngippallaalersorigamiuk, Folketingimi ammaanersiornermi Issittorlu pillugu Folketingimi sapaatit akunnerani uani oqallinnermi saqqummiuppaa.
Oqallisigineqanngippallaarmallu nunatsinni inuit atugarissaarnissamut periarfissaat assigiinngillat.
- Nunatsinni inuiaqatigiinni suunuku oqaluuseriuminaatsittarigut? Isumaqarpunga tamanna oqallisigisariaqarlugulu iliuuseqarnissamut siunnersuuteqartariaqartugut, Aaja Chemnitz Larsen oqarpoq.
Nunatsinni najugaqarfiit amerlassusaasa oqallisigineqanngippallaarnerat suleqatinilu Folketingimi politikkikkut naammaginartumik sulinissaminnut killiliisoq, taanna isumaqarpoq.
Assersuutigalugu Naalakkersuisut najugaqarfinni tamani pisussaaffimminnik tamakkiisumik naammassinninngikkaangata, nunatsinni inatsiseqarneq naalagaaffimmit akisussaaffigineqartoq patajaallisaruminaallunilu kommunefogedinik nunaqarfinni tamani atorfinitsitsinissamut akimmititsisoq, taanna isumaqarpoq.
Nunaqarfiit qassinik inuttussusillit matuneqassanersut pillugu apeqqut akinngikkaa
Nunaqarfiit arlaannaalluunniit pinngitsaaliissummik matuneqarnissaat nunaqarfimmiulluunniit pinngitsaaliissummik nuutsitaanissaat kissaatiginngikkini, Aaja Chemnitz Larsen erseqqissaavoq.
Nunaqarfimmiulli illoqarfinnut noorartut ukiuni qulikkuutaani kingullerni amerliartorput. Tamannalu nunaqarfiit ilaasa inukilliartornerannik soorunami kinguneqartoq, taanna oqarpoq.
Aaja Chemnitz Larsen nunaqarfiit qassinik inuttussusillit matuneqassanersut aperineqarami ima akivoq:
- Tamanna IA-mi oqallisigissavarput. Aamma partiit allat Naalakkersuisullu tamanna pillugu oqallinnissaannut kaammattuinnarsinnaavakka, pissutsimmi taakku inuiaqatigiinni atuupput.
Tamannami illit nammineq akisinnaaviuk?
- IA-mi oqallisigissavarput.
Imaannerpa akisinnaanngikkit...
- Tassami... IA-mi oqallisigissavarput. Tamanna nammineq soorunami isumagaqarfigaara, pisussaaffinnilli sapinngisamik naammaginarnerpaamik naammassinninnissara pivara.
