Aaja Chemnitz Larsenip illersornissamut isumaqatigiissut isorineqartoq tapersersoraa
![](/sites/default/files/styles/image_934x467/public/article_images/aaja-chemnitz-larsen_hoej-oploesning_2017_3.jpg?h=c05dcaf3&itok=IOKLFCGR)
Danskit sakkutuuisa nunatsinni nakktutilliinerulernissaannut Issittumi piginnaasanik annertusaaniarnermut isumaqatigiissut Naalakkersuisut ulluni kingullerni isornartorsiortaagaat, Folketingimi ilaasortap Aaja Chemnitz Larsenip tapersersorpaa.
Taassuma Issittumi piginnaasanik annertusaaniarnermut 1,5 milliardit koruuninut isumaqatigiissut, nunatta Issittumi nakkutilliinermi unammilligassakinnerulerneranut ilaatigut iluaqutaasinnaanerarpaa.
- Russit aqqartartuutaat kinamiullu sorsuutaat nunatta imartaatigoortartut tusartarparput. Russit timmisartuutaat malersuutit nunatta aamma silaannaatigooqqusaammata nakkutilliinerusoqarnissaanik siunertaqarneq pissusissamisoorluinnarsoraara, Aaja Chemnitz Larsen oqarpoq.
AAMMA ATUARUK Naalakkersuisut dumper forsvarsaftale til 1,5 milliarder
Tassa, Aaja Chemnitz Larsen Naalakkersuisut assortorpai.
1,5 milliardit koruuninik Issittumi nakkutilliinerunissamut aningaasaliineq
Folketingip illersornissaq pillugu isumaqatigiissutitaaq 2018-imi akueraa. Saniatigut 4,8 milliardit koruuninik Illersornissaqarfimmut 2023-p tungaanut aningaasaliinissaq isumaqatigiissutaavoq.
Partiit illersornissaq pillugu isumaqatigiissusiortut sualummik Atlantikup Avannaani Issittumilu 2023-p tungaanut nakkutilliinerunissamut saniatigut 1,5 milliardit koruuninik 2019-imi aningaasaliipput.
Isumaqatigiissummut aningaasaliissutit 1,5 milliardit koruuniusut affaat - tassa 750 millionit koruunit - timmisartuaqqanik ungasianiit aquttakkanik nunatsinni nunami nakkutilliissutaasussanik marlunnik pisinermut ingerlatsinermullu atorneqassapput.
50 millionit koruunit Kangerlussuarmi sakkutuunngorniarfissamut atorneqassapput.
390 millionit koruunit Savalimmiuni silaannakkut aalerinaarinissamut radarimut atorneqassapput.
Tassami nunanut allanut naalakkersuisoq, Pele Broberg (N), Kangerlussuarmi sakkutuunngorniarfeqarnikkut ungasianiit aquttakkanik nunatta silaannartaani imartaanilu nakkutilliissutaasussanik marlunnik timmisartuaraqarnikkut nunatsinni sakkutuulersortoqarnerunissaanut akerliunerarpoq.
AAMMA ATUARUK Atassut Pele Brobergip naalagaaffeqatigiinni suleqatigiinnerit pillugit oqaasiinut isumaqataanngitsoq
Tassa, taassuma Naalakkersuisuujunnaaqqammertut danskit naalakkersuilu illersornissamut februaarimi isumaqatigiissutaat 1,5 milliardit koruuninik aningaasartaqartoq akerleraa.
- Sakkutuunngorsaarusunngilagut, Pele Broberg oqarpoq.
Aaja Chemnitz Larsenip tamanna paasisinnaanngilaa. Kangerlussuarmilu sakkutuunngorniarfeqalersaarneq aamma pitsaasuusoraa - sakkutuunngorniaanngitsunimmi aamma ilinniarfiusinnaammat.
- Illersornissamik Kangerlussuarmi ilinniarfeqarnissaa pitsaasuussasoraara, taavalu sakkutuujusussaatitaanermuunnaq tunnganani innuttaasunut sakkutuujunngitsunut samminerulluni aamma upalungaarsimaniarnermut ilinniarfiunissaa kissaatigaara, Aaja Chemnitz Larsen oqarpoq.
Naalakkersuisut aaqqiissutissanik allanik piviusorsiortunik innersuussuteqartariaqartut
Pele Brobergip danskit naalakkersuisui nunatsinni politikerinik Issittumi piginnaasanik annertusaaniarnermut isumaqatigiissusiornermi peqataatitsinngippallaarnerat pillugit aamma isornartorsiorpai.
Aaja Chemnitz Larsenili isummani danskit illersornissamut ministeriannik, Trine Bramsenimik (S), ataasiaannarani ataatsimeeqateqarnermini anittareersimanerarpai. Naalakkersuisullu aamma taamaliornissaannut kajumissaarpai.
- Naalakkersuisut anguniagaqartartussaapput, kisianni Issittumi piginnaasanik annertusaaniarnermut isumaqatigiissummiittut sulissutiginianngikkaanni taava allanik piviusorsiortunik qanorlu aningaasaliiffigineqarnissaanik pilersaarusiukkamik aaqqiissutissamut innersuussisoqarsinnaasariaqarpoq. Taamaattumillu takusaqarnikuunngilanga. Aamma aaqqiissutissanik naammassisinnaalluartunik isumaliuteqarutta inerneqartussamillu suleqataaniarutta danskit naalakkersuisui tusarnaassasut isumaqarpunga. Folketingimi sulininni taama misilittagaqarpunga, Aaja Chemnitz Larsen oqarpoq.