Aaja Chemnitz isumaqataasoq: ATV-nik ingerlatsinermut allagartaqarnissaq nunaqarfinni atorunnaarsinneqartariaqarpoq
- Nunaqarfiit kipiluttunaartorsiornerat paasilluarpara.
Folketingimut ilaasortaq, Inuit Ataqatigiinneersoq, Aaja Chemnitz Larsen nunaqarfinni ATV-nik ingerlatsisinnaanermut allagartaqaqqusinerup atorunnaarsinneqarnissaanut atuutiinnarnissaanulluunniit suliamut atatillugu oqarpoq.
Nunaqarfinniittut tamarmik ATV-nik ingerlatsisinnaanermut allagartaqanngikkaluarlutik ingerlatsisinnaanissaat nunaqarfiit peqatigiiffiata Kanunupep piumasaraa.
Nunaqarfiit peqatigiiffiat naapertorlugu nunaqarfinni najugaqaraanni ingerlatsisinnaanermut ilinniarniarneq ajorkusoorpoq. Tamatuma kingunerisaanik eqqagassat qaleriiaaginnalerlutik piiarnissaqanngitsut, siulittaasuusimasoq, Ove Villadsen oqarpoq.
Aaja Chemnitz Larsenillu isumaqatigilluinnarpaa.
Anartarfiit puussiartaat tipilu
- Eqqagassat qaleriiaaginnalersut, anartarfiit puussiartaat iginneqanngitsut, tipi nappaatillu tuniluutilersinnaanerat arlaannaataluunniit akueriinnarsimanavianngikkaluarpaa.
- Taamaammat ATV-t pillugit piumasaqaatit pissutsinut atukkatsinnut naleqqussarneqarnissaat pisariaqarpoq. Suliaq kinguarteqattaaginnarneqarsinnaanngilaq.
AAMMA ATUARUK Bygdeforeningen: Afskaf kravet om kørekort til ATV i bygderne
- Nunaqarfinni pissutsit illoqarfinni pissutsinut sanilliunneqarsinnaanngillat, annermillu Danmarkimi nunap ilusaanut assersuussisoqarsinnaanani, aqqusernit asfalterilerneqanngillat aqqusineeqqallu ujaraaqqanik qalligaanngikkaangamik inuit qangaaniilli pisuinnarlutik ingerlavigisarinerisigut pilernikuusarlutik, ikitsunnguanillu aqqusiniliaqarlutik. Taamaammat ATV-nik ingerlatsinissamut allagartaqarnissamik piumasaqarluni inatsisiliat nalilersoqqinneqarnissaat annertuumik pisariaqartinneqarpoq, Aaja Chemnitz oqarpoq.
Suleqatigiissitaq ukiup affakkaartumik ataatsimiittartoq
Suleqatigiissiaq suliamik misissuivoq. Assartuinermut susassaqarfik nunatsinnik akisussaaffigineqalernikuunngimmat Danmarkillu tamanna akisussaaffigimmagu Naalakkersuisut Danmarkimilu assartuinermut ministeriaqarfik suleqatigiipput.
Suleqatigiissitap ATV-nik ingerlatsisinnaanermut allagartaqartussaanermik atorunnaarsitsisoqarsinnaanersoq misissussavaa – tamannami aatsaat siullermeertumik isornartorsiorneqanngilaq.
AAMMA ATUARUK Ataatsimiititaliap ATV-nik nunatsinni ingerlaarsinaanermut malittarisassat misissussagai
Nunatsinni ATV-mik ingerlatsisinnaanermut allagartaqarnissamut piumasaqaatit Siumumit Inatsisartunut ilaasortap, Henrik Fleischerip 2017-imi apeqquteqaatigaa.
Taanna taamani Partii Naleqqami ilaasortaavoq.
Aaja Chemnitz Larsenip suliaq 2020-mi qaqeqqillugu assartuinermut ministerimut, Benny Engelbrechtimut (S) allakkatigut apeqquteqaatigaa.
Suleqatigiissitaq maanna misissuivoq, ukiullu affakkaartumik ataatsimiittartoq, attaveqaasersuutinut naalakkersuisoq, Erik Jensen KNR-imut oqarpoq.
Nunaqarfinni ATV-nik ingerlatsisinnaanermut allagartaqarneq atorunnaarsinneqassappat ATV-t ”angallannermut sillimaniarnissamut isumannaatsuutitsoqarsinnaaneranik” naliliineratigut aatsaat allannguisoqarsinnaassasoq, assartuinermut ministeri ukiut marluk matuma siorna oqarpoq.
