Atuartut assagiarsuit tappiorannartullu pillugit atuartinneqartut
![](/sites/default/files/styles/image_934x467/public/usk_oplev_naturen_1.jpg?itok=kJZqEDBX)
![](/sites/default/files/styles/image_934x467/public/20180918_093814.jpg?itok=Qt_pRhaV)
Umiarsualivimmi assagiarsoqarpa? Kinguit qanoq portutigisumut pississinnaappat? Aamma aalisakkat ilaat nerisareqatigiinnit peeruppat susoqassava?
Tassa apeqqutit ilaat, Nuummi atuartut annerit immikkut ittumik atuarnerminni, pinngortitaq pillugu nunarsuaq tamakkerlugu suliniaqatigiiffimmit, WWF-imit, aaqqissuussami, akissutissarsisinnaasaat.
Aaqqissuussaq taaguuteqarpoq: Pinngortitaq Misigalugu, tassanilu atuartut uumasunik naasunillu misissuipput, puisimik aalisakkanilluunniit misissuataaripput pinngortitameersunillu igallutik.
- Anilaassalluni nuannareqaara, Nuummi USK-imi 8-b-mi atuartoq Oscar Berg oqarpoq.
Taanna atuaqatinilu ilaatigut pinngortitami ilisimasassarsioriartussapput, laboratoriami misissuissallutik, unammisassallutik pinngortitamullu attuumassuseqartumik nutaalialiorsinnaaneq pillugu suliaqassallutik.
AAMMA ATUARUK Meeqqat inuusuttullu pilersitsisinnaanermut ilinniartinneqassapput
Atuaqatigiit taakku Nuutoqqami naapippagut, tassanilu biologit marluk immamut aqqarlutik ilaatigut assagiarsunnik, kingunnik allanillu atuartunit misissorneqartussanik katersuipput.
Atuaqatigiit atuarfimmut utereermata, biologi Jakob Bredsdorff Frederiksen assagiarsuit suiaassusaat qanoq paasineqarsinnaanersoq pillugu nassuiaavoq.
- Uani manneqarsinnaaniassagami tassani silippoq, uanilu manneqarsinnaavoq, biologi assagiarsuk arnaviaq tigummillugu oqarpoq.
Aamma uumassusillit tappiorannartut pingaaruteqarput
Pinngortitami pisut inunnut pingaaruteqarnerata atuartunit ilikkarneqarnissaa, Kalaallit Nunaanni WWF-imi suliniutinik ataqatigiissaarisoq Kaare Winter Hansen oqarpoq.
- Inuup pinngortitami pisorpassuit pinngitsoorsinnaanngikkai atuartut paasisaqarfigissavaat. Immami sissamilu naasut ilaat minnerpaat pisariaqartippagut, aalisakkat inuussutissatut pisariaqartippagut. Aalisarpallaarutta taava allanut kinguneqassaaq, Kaare Winter Hansen oqarpoq.
Biologi atuartullu assagiarsunnik suli misissuipput. Misissuinerannilu immaqa amerlanerpaat nalusaannik paasisaqarput.
- Una qimerlooriarutsigu, angutiviaasoq takusinnaavarput. Marlunnimmi usoqartoq takusinnaavarput.
Suliniut Kommuneqarfik Sermersuup, Namminersorlutik Oqartussat Nuummi atuarfiit suleqatigiissutigisaraat Novo Nordisk Fondenimillu aningaasaliiffigineqarluni.
Siunissaq ungasinnerusoq eqqarsaatigalugu illoqarfinni nunaqarfinnilu amerlanerni taama ilinniartitsisoqarnissaa anguniagaavoq.
AAMMA ATUARUK Nunavumi inuusuttut qarasaasialerinermik ilinniartinneqartut