Meeqqat inuusuttullu pilersitsisinnaanermut ilinniartinneqassapput
![](/sites/default/files/styles/image_934x467/public/entreprenoerskab2.jpg?itok=-fmKk5IY)
Pikkorissarnermi peqataasut ilaata Maniitsumi Majoriami ilinniartitsisup Elisabeth Berthelsenip atuartitaminut qanoq nutaaliortitsisinnaanini ima assersuuteqarfigaa.
- Nuniagiassaagut assersuutigalugu, nutaaliorlutik pilersitsiniartussaagamik nuniagiareerutta oqarfigissavakka una mammalaaq naliginnaasorujussuusarpoq taava nutaaliornerunnginnami oqarfigissavakka marmeladelioqqusaanngilasi taava arlaannik pilersitsissaasi nammineerlusi nutaamik, Elisabeth Berthelsen oqarpoq.
Ilinniartitsisut sinerissameersut 19-it pilersitsisinnaanermut nutaaliorsinnaanermullu ilinniartitsisinnaanngornissaat anguniarlugu pikkorissartinneqarput.
AAMMA ATUARUK Pilersitsineq ilinniartitsissutaalissasoq
Nunatsinni ilinniartitsisut piginnaanernik sakkussanillu pilersitsisinnaanermut tunngasunik tuniorarnissaat pikkorissaanerup siunertaraa.
- Isumassarsianik nutaanik takunnissinnaanissamut allaanerusumillu eqqarsartariaaseqarsinnaanissamut periaatsinik sakkussanillu ilinniartitsineq pikkorissaanermi sammineqarput, pikkorissaasoq Henrik Thise oqarpoq.
Unammisitsineq
Massakkut ilinniartitsisut atuartuutitik nutaaliorsinnaanermut pilersitsisinnaanermullu ilinniartissinnaanngussavaat. Ilinniartitsisut aammattaaq atuartuutitik pilersitsisinnaanermut tunngasumik unamminermi peqataatissinnaavaat.
- Soorlu ukioq kingulleq imermut tunngasumik unammisitsisugut aamma. Erngup qanoq assigiinngitsutigut atorluarneqarsinnaanera isumassarsiorfigineqarpoq. Unammisitsinermi meeqqat ilikkakkatik atorluarsinnaavaat pitsaasunillu aamma eqqugassaqarpoq. Aamma sassarsinnaanissaq saqqummiisinnaanerlu tassani ilinniarneqarsinnaammata, Pilersitsinermut aningaasaateqarfiup siulersuisuini siulittaasoq Jacob Nitter Sørensen KNR-imut oqarpoq.
AAMMA ATUARUK Siulersuisunngortut aallarnisaasut amerlanerulernissaannut aqqutissiuissasut