34-inik ukiulik pinngitsaaleeriarsimasutut eqqartuunneqartoq paarineqartussanngortinneqarpoq
![](/sites/default/files/styles/image_934x467/public/2023-10/landsretten.jpg?itok=3emZ_6kn)
Angut 34-nik ukiulik eqqartuunneqarmat Kalaallit Nunaani Eqqartuussiveqarfik eqqartuussummik naqissusiivoq. Angut piffissami killiligaanngitsumi paarineqartussanngortinneqarpoq. Angut Maniitsumi ukioq kingulleq peqqarniitsumik pinngitsaaleeriarsimasutut pisuutinneqarpoq.
Kalaallit Nunaanni Politiit tusagassiutinut nalunaarummi taama allapput.
Angutip inunnut pinerluuteqarnernik suliani assigiinngitsuni arfineq-marlunni eqqartuunneqareersimanera, eqqartuussummik aalajangiiniarnermi annermik isiginiarneqarpoq. Pisut taakku arfineq-marluk angutip ukiuni arfineq-marlunni qaammatinilu aqqanilinni 2009-miit 2020-ip tungaanut pineqaatissinneqarsimasunut inissiisarfimmiittussanngortinneqarluni eqqartuunneqarneranik kinguneqarput.
Taamaammallu suliap nunatta eqqartuussiviani suliarineqarnerani aalajangiussaq unnerluussisussaatitaasup Alexander Stürupip iluarisimaartorujussuuaa:
- Pinerlunnermik suliaq taanna pillugu politiinit unnerluussisussaatitaasunillu ukiup ataatsip kingulliup ingerlanerani nukippassuanik atuiffiusimasoq naammassigaluttualerpoq. Unnerluunneqartup inoqatiminut ulorianartuunera pillugu paarineqartussanngortinneqartariaqarnera pisariaqartoq unnerluussisussaatitaasut isumaqarput, eqqissiallaqaangalu Kalaallit Nunanni Eqqartuussiveqarfiup isumaqatigimmatigut.
Suliaq angutip pinngitsaaleeriarsimaneranut tunngasoq Eqqartuussiveqarfik Qeqqani ukioq kingulleq marsimi suliarineqarluni aallartinneqarpoq.