22-nik ukiulik pisuulluni nassuerpoq

- Pisoq pillugu unnerluunneqartoq nassuiaavoq, killisiuinerli matoqqasuummat qanoq nassuiaanersoq maanna oqaatigisinnaanngilarput, oqaatigisinnaavarali pingasunik toqutsisimanini inunnillu sisamanik toqutseriarsimanini tamaasa nassuerutigimmagit.

Politiit allaffissornikkut pisortaat, Claus Risbjerg taama Radioaviisimut nalunaaruteqarpoq.

Killisiorneqartup suna pissutigalugu pinerlussimanera politiinit oqaatigineqarsinnaanngilaq killisiuineq matoqqasumik ingerlanneqarmat.

Pinerlunnerup nalaani toqoriarneqartut paasiniaaviginerini, pinerluttoq politiinit tigusarineqarsinnaalersimavoq, pingasunik toqutsisimasutut sisamanillu toqutseriarsimasutut pasineqarluni.

- Toqoriarneqartut ilaat oqaluttuarpoq niaqqumigut anaaneqarsimalluni aammalu inimi isersimasut allat sakkumik anaalerneqarniarsimagaluartut, Claus Risbjerg oqarpoq.

Toqoriarneqarsimasut allat tassaapput, arnaq 24-nik ukiulik nukappiararlu marlunnik ukiulik, taakkulu tassa annattuupput ajoquserneqarsimanatillu taakkuli illumili allamiissimapput, toqunneqartulli illumi allamiissimallutik.

Toqutaasut tassaapput arnaq utoqqaq 75-nik ukiulik aamma arnaq 31-nik ukiulik pingajuallu tassaalluni niviarsiaraq arfineq pingasunik ukiulik, taaku tamarmik ilaqutariipput.

Toqutsisoq ilaqutariinni qanoq inissisimanersoq suli oqaatigineqarsinnaanngikkallarpoq.

Toqutaasut misissorneqarallarnerisa paasinarsisippaat, sakkumik suugaluarnersumik niaqqumikkut anaaneqartarsimagunartut.

Annertuumik ikiligaasimasut marluusut - angutit aappaa 32-nik ukiulik aappaalu 81-nik ukiulik - Upernaviup napparsimmavianit ippassaq Nuuliaanneqartut ualeq maanna Danmarkimut Rigshospitalimut aallarunneqarput.

- Sanami nakorsat naliliineri malillugit ikiligaasimasut tamarmik Rigshospitalimut aallarunneqarnissaat pisariaqalersimavoq.

Dronning Ingrid-ip napparsimmavissuani nakorsaaneq, Carsten Thordal ualeq manna oqarpoq. 81-nik ukiullip inuunera navianartorsiortoq aamma oqaatigalugu.

- Marluullutik ajoqusersimaqaat, taamaaginnarpulli, Carsten Thordal oqarpoq.

Upernaviup eqqartuussiviani matoqaasumik killisiuineq, politiinit Nunatta Eqqartuussivianut matoqqasumik suliareqqitassanngortippaat, politiit taama iliornerannut pissutaatinneqarpoq, ammasumik suliarineqarnerani paasiniaanermut tamanna ajoqutaasinnaammat.

- Uani suliami taamatut innimiginninnissaq pissusisamisuungitsoq uagut isumaqarpugut. Pisisimasoq soorunami alianaqaaq, aammali nunaqarfimmi Kalaallit nunaatalu sinnerani malinnaaffiumaneqaqaaq, Uagullu isiginninnerput malillugu qanoq pisoqaqqinnaarsimaneraniktamat paasitinneqarnissaat pingaaruteqartoq.

Claus Risbjerg oqarpoq.

Nunatta eqqartussiviata aalajangernissaa aqagu pissasoq politiinit ilimagineqarpoq. Nunattalu Eqqartuussiviani matoqqasumik killisiuisoqassappat, politiit nalunaarutigisinnaanngussavaat killisiuinermi qanoq paasisaqartoqarsimanera.

Pisumut atatillugu Nutaarmiuni takunnissimasut maanna politiinik paasiniaavigineqarput. Toqusoqarsimatillugulu paasiniaasartut Danmarkimeersut maanna Nunatsinnut tikereersimalerput.