2017 silaannakkut angallannerup oqaluttuarisaanerani aatsaat taama isumannaatsigisoq
Nittartagaq Aviation Safety Network, nunani tamalaani silaannakkut angallannermut tunngasunik katersuisartoq, taama allaaserisaqarpoq.
Aviation Safety Network, Hollandimiumit Harro Ranterimit pilersinneqarpoq, timmisartuussinerillu qulit siorna ajutoorfiusut akornanni inuit 73-it siorna januaarip aallaqqaataata decembarillu ulluisa 31-ata akornanni ajunaarsimasut nalunaarsorneqarsimapput.
Assersuutigalugu 2016-imi timmisartut ajutoortut 16-it akornanni ajunaartut 303-upput.
Aviation Safety Networkip timmisartuussinerni ajutoornerit 1990-ikkunnili nalunaarsortalerpai, timmisartullu ataatsip nakkarnerani inuit ajunaartut 100-nit amerlanerusut kingullermik nalunaarsorneqarneranit ullut 792-it sapaatiummat ingerlasimasut nittartakkap taassuma allaaseraa, tamannalu aamma rekordiulluni.
Timmisartut assartuussinermut atorneqartartut tallimat, timmisartullu inunnik ilaasoqarlutik timmisartuussisartut tallimat siorna nakkarput.
Ajutoorneq kingulleq Australiami Sydneymi decembarip ulluisa 31-anni pivoq, timmisartuaraq tassani nakkarmat. Inuit arfinillit tassani ajunaarput.
Ritzau