Ukiup affaanut naatsorsuutit: Ukioq 2017 RAL-imut ajorluinnarsimavoq
Naatsorsuutit qimerlualaaraanni takuneqarsinnaavoq Royal Arctic Line ukioq manna ukiup affaani siullermi 28 millionit koruuninik amigartooruteqartoq. Amigartoorutit naatsorsuutigisimasamit 13 millionit koruuninik amerlanerupput, 15 millionit koruuninimmi amigartooruteqartoqarnisssaa ilimagineqarsimagaluarmat.
IT-qarnitsigut naammaginartumik ingerlasinnaasimanginneq ukiup affaani siullermi unamminartut annerpaartarisimavaat, suliffeqarfiullu amigartooruteqarneranut pissutaaqataasimalluni.
Nunatta kitaata avannaani siku pissutigalugu kingusinaartumik assartuilernerit, Sikuki Nuuk Harbourimut ilassutitut aningaasartuutit, umiarsuarnullu nutaanut aningaasartuutit RAL-ip ukiup affaanut siullermut naatsorsuutaasa amigartooruteqarfiunerannut ilaapput.
AAMMA ATUARUK Piareersarluarsimasuugutta kukkunerit pinngitsoorsimassagaluarput
Ingerlatseqatigiiffiup aningaasarsiornera ukioq manna eqqorneqaannanngilaq. Umiarsuaq ataaseq ilulissamut aamma aporpoq, umiarsuarlu alla Tunumi ajoquserluni, allallu krania aamma ajornartorsiutaasimalluni
IT-qarnitsigulli ajornartorsiutit aningaasartuutaanerpaasimapput, tamannami pissutaalluni containerit kukkusumik usilersorneqartarsimapput, puigorneqarsimallutilluunniit, kukkusumullu aamma assartorneqartarsimallutik.
Royal Arctic Linep pisortaa Verner Hammeken IT-qarnikkut ajornartorsiutit pillugit sapaatip-akunnerata siuliani ima oqarpoq:
AAMMA ATUARUK Mary Arctica iluliamut aportoq
- Ukioq 2017 uagutsinnut ajornartorsiorfittut taaguuteqartilereerparput. Umiarsuit ilulissanut aportut, ikkarlittut allatulluunniit ajornartorsiortut. Atortutigullu ajornartorsiutit, suleriaatsitigullu ajornartorsiutit puigussanngilagut, RAL-ip pisortaa Verner Hammaken oqarpoq.
Ajornartorsiutit 2017 naatinnagu aaqqiivigineqarsimanissaat pisortap naatsorsuutigaa.
Ukiup sinnerani patajaannerusumik sullissisoqarsinnaanissaa naatsorsuutigineqarpoq. Ukiup sinnerani 5 aamma 15-it millionit koruuninik sinneqartooruteqarfiunissaa naatsorsuutigineqarpoq, siusinnerusukkut missingersuusiat takutikkaluarpaat RAL 15 aamma 25 millionit koruunit akornanni ukioq manna sinneqartooruteqartussatut naatsorsuutigineqartoq.
