17-inik ukiullit Sisimiuni ikuallatsitsisimasutut eqqartuunneqartut
17-inik ukiullit marluk Sisimiuni ikuallatitsisimasutut Nunatta Eqqartuussisuuneqarfiani ullumi eqqartuunneqartut, Kalaallit Nunaanni politiit tusagassiuutinut nalunaaruteqarlutik taama allapput.
Angut arnarlu tamarmik 17-inik ukiullit Sisimiuni siorna septemberip ulluisa sisamaani ikuallatsitsisimasutut pisuutinneqarlutik nunatta eqqartuussisuuneqarfiani pineqaatissinneqarput.
- Taakkua arlaleriarlutik tillinniarsimanerat pillugu aamma eqqartuunneqarput, arnarlu annertuunik aserorterisarsimasutut pisuutinneqarpoq, politiit tusagassiuutinut nalunaaruteqarlutik taama allapput.
Inuusuttut taakkua marluk siullermik eqqartuussivimmi pineqaatissinneqaramik inuusuttunut pinerluuteqartunut immikkut ittumik isumaginninnikkut ukiumik ataatsimik sivisutigisumik nakkutigineqartussanngorlugit pineqaatissinneqarput.
AAMMA ATUARUK Politiit Sisimiuni ikuallattoqarnerani takunnissimasussarsiortut
Pinerluuteqarnerat sakkortusoq
Unnerluussisussaatitaasut suliaq eqqartuussisuuneqarfimmut suliassanngortippaa, inuusuttut taakua marluk ikuallatsitsisimanerat pillugu eqqartuussiviup pineqaatissiineranit sakkortunerusumik pineqaatissinneqartariartut unnerluussissussaatitaasut isumaqarmata.
- Inuit allat pigisaanik illuutinik piaaraluni ikuallatsitsineq pinerluttuliorneruvoq,
tamannalu politiit unnerluussisussaatitaasullu ilungersunartorujussuartut isigaat, inunnut ulorianartorsiortitsisinnaammat annertoorujussuarmillu ajoqusiinermik kinguneqartarmat.
Tamaattumik eqqartuussut nunatta eqqartuussisuuneqarfianut suliassanngoriipput, unnerluussisussaatitaasoq Emil Maegaard-Hoffmann taama oqarpoq.
Nunatta eqqartuussisuuneqarfiata pineqaatissiissutaa unnerluussisussaatitaasup naammagisimaarpa, tassalu angut 17-inik ukiulik qaammatini pingasuni pineqaatissinneqarsimasunut inissiisarfimmiittussanngorlugu pineqaatissinneqarmat, pinerluuteqarsimasunullu isumaginnittoqarfimmit ukiuni pingasuni nakkutigisassanngortinneqarluni.
AAMMA ATUARUK Angut inuusuttoq Sisimiuni ikuattoqarneranut atatillugu tigummigallarneqartoq
Arnaq 17-inik ukiulik pinerluuteqarsimasunut isumaginnittoqarfimmit ukiuni marlunni nakkutigisassanngortinneqarpoq.
- Inuusuttut ukiukinnerat nunatta eqqartuussisuuneqarfiata pineqaatissiinermi pingaartippaa, ikuallatsitsinerlu ingasattumik inatsisitigut unioqqutitsinertut isigalugu, taamaattumik isumaginnittoqarfimmit nakkutigisassanngortinneqarnerat naammagineqarani, politiit taama allapput.
Siorna septemberip ulluisa sisamaanni Sisimiuni Frederik den IX pladsip eqqaaniittumi siornatigut Sisimiut Tusataata inissisimaffigisimasaa ikuallappoq.
Ullut marluk qaangiummata angut inuussuttoq ikuallatsitsisimasutut pasineqarluni ulluni 28-ni politiinit tigummigallagassanngortinneqarpoq.
