Illersuiniaqatigiit: 150 millionit koruunit naammannavianngillat
![](/sites/default/files/styles/image_934x467/public/kenbower3.jpg?itok=i4OlilE8)
Danmarkip amerikamiut nunatsinni sakkutooqarfigisimasaanni saliinissamut akisussaaffik tigugaa pitsaasoq, avatangiisinik illersuiniaqatigiit isumaqarput.
Saliinissamulli 150 millionit koruunit naammanngillat saliinerlu naatsorsuutigisamit sivisunerussaaq, pinngortitaq pillugu nunarsuaq tamakkerlugu suliniaqatigiiffik, WWF, isumaqarpoq.
- Ukiorpassuarni saliisoqassaaq 150 millionit koruunillu naammannavianngillat, WWF-ip nunatsinni immikkoortortaqarfiani pisortaq Kaare Winther Hansen oqarpoq.
Pituffiup eqqaani saliineq ilaatigut sivikippallaarsimasoq taassuma assersuutigaa.
Pituffimmi sukumiisumik saliisoqarsimanngitsoq
- Tassani sukumiisumik saliisoqanngilaq. Taamaammat neriuutigaara sukumiinerusumik tamakkiisumillu saliisoqassasoq, tamannalu sivisussaqaaq.
Pituffimmi nunamineq 3.500 tonsiusoq assanneqartoq eqqakkatut ulorianartutut immikkoortinneqarpoq, naak ilimagineqartut 50 tonsiugaluartut. Eqqakkallu ulorianartut 3.500 tonsit nunaminertamut matoorunneqarput.
Avatangiisinik illersuiniaqatigiiffiup Avatap siulittaasuata, Mikkel Myrupip, isumaqatigiissuteqarneq pitsaasumik alloriarnertut taavaa. 150 millionit koruunilli naammannavianngitsut, Myrup Kaare Winther Hansenitulli isumaqarpoq.
- Sunik suliassaqarnersoq missingersuinissaq ataasiuvoq. Tikillunili assaagaanni sunik mingutsitsisoqarsimannersoq paasinnilernissaq allaavoq, Mikkel Myrup oqarpoq.
WWF: Pingaarnersiuisoqartariaqartoq
Siunniussat pillugit nalunaarut atsioqatigiissutigineqartoq Folketingimit akuerineqarpat, amerikamiut sakkutooqarfigisimasaat isumaqatigiissuteqarfigineqariinngitsut salinneqassapput.
- Ikkatteq Marrarlu tassa taakkuupput massakkut sammineqaleruttortussat, Naalakkersuisut siulittaasuat Kim Kielsen oqarpoq.
Pingaarnersiuillunili tulleriiaarisoqarnissaa, WWF-ip pisortaata neriuutigaa.
- Inunnut uumasunullu ulorianaateqarsinnaasut avatangiisinullu mingutsitsisut. Ajornerit isumageqqaartigit kusanarsagassaannaallu kingulliullugit, Kaare Winther Hansen oqarpoq, Kulusuup eqqaani orsussaasivikoq ilaatigut tikkuarlugu.