15-inik ukiulik borgmesteritut sungiusartoq

Sisimiuni Minngortunnguup Atuarfiani 10.klassimi atuartut suliffeqarfinnik misileraaleruttorput, suliffeqarfinnik assigiinngitsunik sapaatip-akunnerini marlunni misileraanertik aallarteruttorlugu. Taama misileraasoqartarnera takornartaanngilaq, borgmesteritulli sulinissaq misilillugu qinnuteqarnissaq immaqa nalinginnaasuugunanngilaq.

15-inik ukiullip Gerth Johansenip borgmesteritut sulinissani soqutigisimavaa, borgmesteritullu sulinissamik qinnuteqaat, Qeqqata Komunniani borgmesterip Hermann Berthelsenip akuersaarsimavaa.

Borgmesteri qanittumik malittarissavaa

Politikimik soqutigisaqarnini pissutigalugu borgmesteritut sulinermik misiliinissamut qinnuteqaateqarsimalluni, Gerth Johansenip nammineq oqaatigaa:

- Politikkimik malinnaassallunga soqutigisarigakku Borgmesterip allaffiani suliffimmik misiliinissara qinersimavra. Borgmesteri oqalugiartoq ilagereerpara, maannamullu borgmesteri Hermann Berthelsen assigiinngitsunut ataatsimiigiarneranut malinnaaffigaara politikkimullu tunngasut atuartarlugit. Aamma Naalakkersuisunut siulittaasuugallartup Kim Kielsenip Sisimiuniinnerani ataatsimeeqatigaarput. Kisianni ataatsimiinnernut matoqqasunut suli peqataanngilanga, Gerth Johansen oqarpoq.

Taanna ukioq manna novembarip 21-ata tungaanut Qeqqata Kommuniani "borgmesteritut" inissisimassaaq.