Politiit ullormut nalunaarusiaat: 15-inik ukiulik biilinik aallarussisimasutut pasineqartoq

Unnuaq ulappuffiusimasoq Kalaallit Nunaanni Politiit pigaartuisa pisortaat malunngornermi ullaakkut oqarpoq.

- Unnuarsiortut sapaatit-akunnerisa naanerisulli ulapissimanerartigipput, pigaartut pisortaat Malik Olesen oqarpoq.

Meerarpaaluilli Nuummi Jagtvejimi biilinik tillinniartut taassuma immikkut maluginiarpai.

- Inuusuttuaqqat arlallit biilerlutik aallartut takuneqarsimanerinik politiit ullaassaq nalunaaqutaq 04.30 nalunaarfigineqarput, Malik Olesen oqarpoq.

Aallarussisuussangatinneqartoq politiit nal. 05.30 missaani naammattoorpaat biilinillu tillissimasutut pasineqarluni.

- Nukappiaraq inuusuttuaraq 15-inik ukiulik suliffeqarfiup biilinik aallarussisimasutut pasineqarpoq, pigaartut pisortaat oqarpoq.

Amerlanerusinnaasut

Takunnittup 15-inik ukiulik kisimiinngitsoq takusimallugu politiinut nalunaarpoq, aallarussisulli qasserpiaanersut politiit suli paasininngilaat. Pasineqartoq 18-it inorlugit ukioqarmat pillaatissinneqarsinnaanermullu ukiui inuummata nukappiaqqap angajoqqaavisut akisussaasut aamma kommunimi isumaginninnermik oqartussat suliami peqataatinneqassapput.   

Politiit pigaartuisa pisortaat suliaq pillugu annerusumik oqaaseqarsinnaanngilaq, ullaarli pisoq misissorneqartoq oqarluni.

- Inuusuttuaqqat biilinik aallarussisarnerat ukkataraarput. Pasinarsinnaasunillu takunnissimasut uatsinnut sianersinnaapput. Pingaartumik unnuami ullaassamiluunniit takunnittoqarsimappat, pigaartut pisortaat oqarpoq.

Pasinarsinnaasumik takusaqarsimaguit Kalaallit Nunanni Politiit 70 14 48-mut attavigisinnaavatit.