Inersimasunut kingunerlutitsisunut siunnersuisarfik nutaaq pilersinneqartoq
Oqarasuaatikkut siunnersuisarfik sapaatip akunnerani ulluni pingasuni ammasassaaq, taassalu marlunngornermi aamma sisamanngornermi nalunaaqutaq unnukkut arfineq marluniit qulingiluat tungaannut aamma arfininngornermi ualikkut pingasuniit tallimat tungaannut.
Naalakkersuisut nuna tamakkerlugu angalaqatigiittartunik 2013-imi pilersitsipput taakkua tassaallutik tarnip pissusianik ilisimassallit, inersimasut meeraanerminni kinguaassiuutitigut atornerlunneqarsimanermikkut kingunerlutsitsisunut katsorsaanermik suliaqartut.
Oqarasuaatikkut siunnersuisarfik angalaqatigiittartut suliaanut tapertatut pilersinneqartoq, Namminersorlutik Oqartussat nittartakkaminni taama allapput.
Oqarasuaammut 141-mut sianerneq akeqanngilaq. Oqarasuaammut sianersinnaaneq ullumikkut marlunngornermi apriilip ulluisa 19-anni ammassaaq.