102-nik ukiulik Anthon Geisler eqqissivoq

Iluliarmiu Anthon Geisler 102-nik ukioqarluni Iluilissani utoqqaat illuanni Unganartumi ullaaq eqqissivoq.

Anthon Geislerip jorngua, Hugo Svensson KNR-imut oqarpoq.

- Naggammik ima oqarfigivaatigut; Eqqissiguma aliasuutiginiaqinasinga. Sivisuumik inuuninni misigisarpassuaqarnikuuvunga, Hugo Svensson, Antuup oqaasiinut kusanartunut kingullernut tunngatillugu taama oqarpoq.

AAMMA ATUARUK 101-inik ukiulik: Nunatsinni namminersortut utoqqaanersaat soraarninngorpoq

Anthon Geisler Ilulissani ukiut 50-it sinnerluni nammineq kioskiutiminik ingerlatsinikuuvoq, 101-inillu ukioqalerami napparsimalernini peqqutigalugu soraarninngorluni.

Soraarninngornermi kingorna utoqqaat illuanni najugaqalerpoq, tassanilu paarilluarneqartoq, jorngua oqaluttuarpoq.

- Utoqqaat illuanni isumagineqarluarnermini sullinneqarluarnermilu qujamasuttorujussuuvoq, taakkulu qutsavigisorujussuuai, Hugo Svensson oqarpoq.

AAMMA ATUARUK Uannut naleqqutinngikkaluarpoq

Anthon Geisler, 100-nik ukioqaleraluarluni llulissani kioskiutiminik suli ingerlatsinini pillugu,100-liinermini nersorniarneqarpoq.

Ilaqutaasut misissuinerminni paasisaat naapertorlugu Anthon Geisler nunatsinni angutini ukioqqortunersaalluni toqukkut qimaguppoq.

Taassuma ilisaanissaa maanna pilersaarusiorniarneqaleruttortoq jornguata KNR-imut oqaatigaa.